చంద్రబాబును ఆ బ్యాడ్ లక్ వెంటాడుతుందా?

ఇక 2014లో చంద్రబాబు బీజేపీతో పాత్తుపెట్టుకుని, జనసేన సహకారంతో బరిలోకి దిగి విజయం సాధించారు. తిరిగి 2019 ఎన్నికల్లో ఆయన ఒంటరిగా పోటీ చేసి ఓటమి పాలయ్యారు. రెండుసార్లు అధికారంలో ఉన్న పార్టీ గెలవడం సెంటిమెంట్ అని వైసీపీ నేతలు అంటున్నారు. చంద్రబాబుకు మాత్రం ఒక్కసారి ఛాన్స్ ఇవ్వడం ఆంధ్రప్రదేశ్ ప్రజలకు అలవాటుగా మారిందని, 2024 ఎన్నికల్లో తమదే విజయమని వైసీపీ నేతలు ధీమాగా ఉన్నారు.

నిజానికి చంద్రబాబులోనూ ఈ భయం ఉంది. 2004, 2009 ఎన్నికలే ఆయన గుర్తుకు వస్తున్నాయంటున్నారు. 2009లో టీఆర్ఎస్, లెఫ్ట్ పార్టీలతో మహాకూటమిని కట్టినా చంద్రబాబు గెలవలేకపోయారు. ఈసారి కూటమి కట్టినా ఫలితం ఉంటుందా? లేదా? అన్న సందేహం ఆయనను వెంటాడుతుంది. అందుకే వరసగా ప్రభుత్వంపై ప్రజల్లో వ్యతిరేకత వచ్చేలా అన్ని కార్యక్రమాలు చేపడుతున్నారు. ఇసుకతో మొదలు పెట్టి క్యాసినో వరకూ ప్రభుత్వం పై ప్రజల్లో వ్యతిరేకత వచ్చేలా కార్యాచరణను రూపొందించుకుంటున్నారు. గతానికి, ఇప్పటికీ టీడీపీ పరిస్థితిలో చాలా మార్పు వచ్చింది. ఇంతకు ముందు ఉన్న సామాజికవర్గాల బలం టీడీపీ కోల్పోయింది.

అయితే వచ్చే ఎన్నికలకు ఇంకా రెండేళ్ల సమయం ఉండటంతో టీడీపీ పరిస్థితి మెరుగుపడే అవకాశముందని చంద్రబాబు ఆశాభావంతో ఉన్నారు. ఇప్పుడే ప్రభుత్వ ఉద్యోగుల్లో వ్యతిరేకత ప్రారంభమయింది. ప్రభుత్వ ఉద్యోగులు, వారి కుటుంబ సభ్యులు 3.5 లక్షల మంది ఉంటారు. గత ఎన్నికల్లో వైసీపీ, టీడీపీకి ఓట్ల తేడా కేవలం ఐదు లక్షలు మాత్రమే. ఇక అమరావతి రాజధాని అంశం, పోలవరం, అభివృద్ధి లేకపోవడం, అద్వాన్న రహదారులు, ఇసుక కొరత వంటి అంశాలు మిగిలిన ఓట్లను తెచ్చి పెడతాయన్న అంచనాలో చంద్రబాబు ఉన్నారు. ప్రజలు ఖచ్చితంగా మార్పు కోరుకుంటారన్న ఆశతోనే చంద్రబాబు పార్టీని నెట్టుకొస్తున్నారు. మరి ఏం జరుగుతుందో చూడాలి.