అమ్మకు పాదాభివందనం... నాన్నతో ఆలింగనం

నారా లోకేష్ హైదరాబాద్ లోని తన ఇంటి నుంచి బయలుదేరి ఎన్టీఆర్ ఘాట్ కు వెళ్లి అక్కడి నుంచి శంషాబాద్ ఎయిర్ పోర్టుకు చేరుకున్నారు. నేరుగా కడపకు వెళ్లి అక్కడ అమీన్ పీన్ దర్గాను సందర్శించి, చర్చిలో ప్రార్థనలను చేసిన అనంతరం రోడ్డు మార్గం ద్వారా తిరుమలకు చేరుకోనున్నారు. ఈ రాత్రికి తిరుమలలోనే నారా లోకేష్ బస చేసి ఉదయం శ్రీవారిని దర్శించుకుని ప్రత్యేక పూజలు నిర్వహించనున్నారు. మధ్యాహ్నానికి కుప్పం చేరుకుంటారు. ఎల్లుండి నుంచి నారా లోకేష్ పాదయాత్ర ప్రారంభం కానుంది. అందుకు తగిన ఏర్పాట్లను ఆయన స్వయంగా పరిశీలించనున్నారు.

నారా లోకేష్ నాలుగు వందల రోజుల పాటు నాలుగు వేల కిలోమీటర్లు పాదయాత్ర చేయనున్నారు. అంటే ఏడాదికి పైగానే ఇంటి మొహం చూడరు. దాదాపు పదిహేను నెలల పాటు కుటుంబ సభ్యులకు దూరంగా ఉండటం అందరికీ సాధ్యం కాదు. కసి, పట్టుదలతో పాటు పార్టీని అధికారంలోకి తీసుకురావాలంటే ఆ మాత్రం రిస్క్ చేయక తప్పదు. పార్టీకి భవిష్యత్ నేతగా ఆయన క్యాడర్ లో భరోసా నింపాలి. నేతల్లో ఉత్సాహాన్ని పెంచాలి. అప్పుడే పార్టీ అధికారంలోకి వస్తుంది. తన తండ్రి చంద్రబాబు వయసుకు అది సాధ్యం కాకపోవడంతో ఆ బాధ్యతను లోకేష్ భుజానికెత్తుకున్నారు.

నిజానికి నాలుగువేల కిలోమీటర్ల పాదయాత్ర అంటే అంత సులువు కాదు. ఎండనక, వాననక, చలికి అన్నీ భరించాలి. గోల్డెన్ స్పూన్ తో జన్మించిన నారా లోకేష్ పెద్ద రిస్క్ చేస్తున్నారనే చెప్పాలి. తన నాయకత్వంపై నమ్మకం పెంచుకోవాల్సిన బాధ్యత కూడా నారా లోకేష్ పై ఉంది. గత ఎన్నికల్లో తాను ఓటమి పాలయినా కుంగిపోకుండా, నేతలను సమన్వయం చేస్తూ తండ్రికి చేదోడు వాదోడుగా నిలిచిన నారా లోకేష్ పదిహేను నెలల పాటు ప్రజల్లనే ఉండనున్నారు. వారి సమస్యలను ప్రత్యక్షంగా పరిశీలించనున్నారు. దగ్గరగా వారి వేదనను చూడగలుగుతారు. ఈ పాదయాత్ర నారాలోకేష్ ను సమూలంగా మారుస్తుందని పార్టీ నేతలు సయితం భావిస్తున్నారు. ఆల్ ది బెస్ట్ లోకేష్.