కార్మిక దినోత్సవం నేడు

సాఫ్ట్‌వేర్ ఇంజినీర్ నుంచి చిన్న కూలీ వరకూ నేడు సెలవును ఖచ్చితంగా పాటిస్తారు. ప్రభుత్వాలు కార్మికుల సంక్షేమ కోసం అనేక పథకాలు ఈరోజు ప్రకటిస్తాయి. రాజకీయ పార్టీలు సయితం కార్మికుల కోసం వారిని ఆకట్టుకునేందుకు రేపటి వేదికలను తమకు అనుకూలంగా మార్చుకోవడం రొటీన్‌గా మారింది. ప్రధానంగా మన దేశంలో కేంద్ర ప్రభుత్వం నుంచి అన్ని రాష‌్ట్ర ప్రభుత్వాలు కార్మికుల సంక్షేమం కోసం వరాలు ప్రకటించే రోజు ఇది. ఈ మే 1వ తేదీన తమకు అనుకూలంగా ప్రభుత్వం నుంచి ప్రకటన వస్తుందని కార్మిక సంఘాలు కూడా ఆశిస్తుంటాయి. వారి ఆశలు నెరవేరుతుంటాయి.

మే డే నాడు అనేక ఉద్యమాలు ప్రాణం పోసుకున్న సందర్భంలో కార్మికులు విజయోత్సవాలు కూడా ప్రతి ఏటా జరుపుకుంటూ వస్తున్నారు. కార్మిక సంఘాలు తమ వేతనాలు పెంచాలని, సంక్షేమ కార్యక్రమాలను వేగవంతం చేయాలని, పెరుగుతున్న ధరలకు అనుగుణంగా తమకు అన్ని రకాల సౌకర్యాలు కల్పించాలని కోరుతూ ఆందోళనకు దిగుతాయి. మే 1వ తేదీన వారికి అనుకూలంగా కొంత ప్రకటనలు వచ్చే ఛాన్స్ లేకపోలేదు. అందుకే మే డే వస్తుందంటే కార్మికుడికి పండగ లాంటిదే. కేవలం సెలవుదినంగానే వారు మే డేను చూడరు. తమకు ఆర్థిక స్వాతంత్ర్యంతో పాటు వెట్టి చాకిరీని నుంచి విముక్తి కల్పించిన రోజుగానే భావించి కార్మికులందరూ ఒకచోట చేరి సంబరాలు చేసుకుంటారు. అదే మేడే ప్రత్యేకత.

ఎన్నో కార్మిక ఉద్యమాలను స్మరించుకునే రోజుగా మేడేను పరిగణిస్తారు. ఎనిమిది గంటల పనిని సాధించింది ఈరోజు కావడంతో మే 1వ తేదీని ప్రత్యేకంగా ప్రతి కార్మికుడు భావిస్తారు. అవును. ఇది కార్మికుల రోజు. వారు సంబరాలు చేసుకునే ఒక రోజు. కార్మికులు తాము సాధించిన అనేక విజయాలను గుర్తుకు తెచ్చుకుని, భవిష్యత్ ప్రణాళికను సిద్ధం చేసుకునే రోజు మేడే. ఈరోజు నుంచి మరింత స్ఫూర్తి పొంది కార్మికులు తాము సాధించాల్సిన డిమాండ్ల కోసం ఉద్యమ క్యాలెండర్‌ను రూపొందించుకుంటారు. అణిచివేతకు గురైన తమ బతుకులను బాగు చేయాలంటూ ఉద్యమాలకు పిలుపు నిచ్చే రోజు కావడంతో ప్రతి కార్మికుడికి ఈరోజు ఒక ప్రత్యేక దినమే. వెరీ వెరీ స్పెషల్ అని చెప్పడంలో ఏ మాత్రం సందేహం లేదు.