టీవీ సీరియల్ నటి ఆత్మహత్య…. టిక్ టాక్ తో పరిచయం?

తెలుగు టీవీ సీరియల్ నటి కొండపల్లి శ్రావణి మంగళవారం రాత్రి ఆత్మహత్యకు పాల్పడ్డారు. హైదరాబాద్‌లోని ఎస్ఆర్ నగర్ పోలీస్ స్టేషన్ పరిధిలో గల మధురా నగర్ హెచ్ 56 బ్లాక్ రెండవ ఫ్లోర్‌లో నివసిస్తున్న శ్రావణి బెడ్ రూం లో ఉరి వేసుకుని ఆత్మహత్య చేసుకుంది. కాకినాడ గొల్లప్రోలుకు చెందిన దేవరాజు రెడ్డితో శ్రావణికి టిక్ టాక్ ద్వారా పరిచయం ఏర్పడింది. ఆ పరిచయం కాస్తా స్నేహంగా మారింది. అయితే గత కొంతకాలంగా శ్రావణిని దేవరాజ్ రెడ్డి వేధింపులకు గురి చేయడం ప్రారంభించాడు. దీంతో తీవ్ర మనస్తాపానికి గురైన శ్రావణి మంగళవారం రాత్రి సమయంలో బెడ్ రూంలో ఉరి వేసుకుని ఆత్మహత్య చేసుకుంది. బెడ్ రూం కి వెళ్లిన శ్రావణి ఎంతకీ రాకపోవడంతో అనుమానించిన కుటుంబ సభ్యులు డోర్ పగలగొట్టి చూడగా శ్రావణి విగత జీవిగా పడి ఉంది. వెంటనే ఆమెను యశోద హాస్పిటల్‌కు తరలించారు.

వేధింపుల వల్లనే…

శ్రావణిని పరిశీలించిన వైద్యులు అప్పటికే చనిపోయిందని నిర్ధారించారు. దేవరాజు రెడ్డి వేధింపుల వల్లే తమ కూతురు ఆత్మహత్యకు పాల్పడిందని శ్రావణి కుటుంబ సభ్యులు ఎస్ఆర్ నగర్ పోలీస్ స్టేషన్‌లో ఫిర్యాదు చేశారు. శ్రావణి మృతికి కారణమైన దేవరాజును కఠినంగా శిక్షించాలని డిమాండ్ చేశారు. దీనిపై కేసు నమోదు చేసిన పోలీసులు దర్యాప్తు చేస్తున్నారు. కాగా, శ్రావణి గత ఎనిమిది సంవత్సరాల నుండి తెలుగు టీవీ సీరియల్స్ అయిన మౌనరాగం, మనసు మమత, పలు సీరియళ్లలో నటిస్తోంది. దేవ్ రాజ్ భాగ్య రేఖ సీరియల్ లో నటిస్తున్నారు.