జగన్ వీడియో వైరల్.....!
వైసీపీ అధినేత జగన్ చేసిన ఓ పని ఇప్పుడు సోషల్ మీడియాలో వైరల్ అయింది. జగన్ ప్రస్తుతం విజయనగరం జిల్లాలో ప్రజాసంకల్ప పాదయాత్ర చేస్తున్నారు. వై.ఎస్ జగన్మోహన్ రెడ్డి నెలిమర్ల బహిరంగసభలో ప్రసంగిస్తుండగా కిక్కిరిసిపోయిన జనం మధ్యలో నుంచి ఓ ఆటో వస్తుంది. ఆ ఆటోలో నిండు గర్భిణి ఉన్నారు. ఆమెను ప్రసవం కోసం ఆసుపత్రికి తరలించాల్సి ఉండగా జనం మధ్యలో ఆటో ఆగిపోయింది. ఇది తెలుసుకున్న జగన్ వెంటనే తన ప్రసంగాన్ని ఆపేశారు.
ఆటోకు దారి ఇవ్వాలంటూ......
ఆటోకు దారి ఇవ్వాల్సిందిగా జనాన్ని పదే పదే కోరారు. జనం కూడా జగన్ చెప్పినట్లే ఆటోకు దారి ఇచ్చారు. వైఎస్ బతికుండగా అత్యవసర పరిస్థితుల్లో ఆసుపత్రికి తీసుకెళ్లేందుకు 108 వాహనాలు ఉండేవని, ఇప్పుడు ఆ "కుయ్ కుయ్" మోత విన్పించకపోవడానికి చంద్రబాబు మాత్రమే కారణమన్నారు. జగన్ పదే పదే ఆటోకు దారి ఇవ్వాలని సూచించడంతో ఆటో క్షేమంగా ఆసుపత్రికి చేరుకుంది. తర్వాత జగన్ తన ప్రసంగాన్ని కొనసాగించారు. ఇప్పుడు ఈ వీడియో సోషల్ మీడియాలో వైరల్ అయింది.
