Ukraine War : నియంత.. ఉన్మాది ఎవరి మాట వినడు

ఇప్పటికిప్పుడు రష్యాకు వచ్చిన ఇబ్బంది లేకపోయినా, నాటో విధించిన ఆంక్షలతో దీర్ఘకాలంలో ఇబ్బంది పడక తప్పదంటున్నారు. యుద్ధం అనేది తప్పనిసరి పరిస్థితుల్లో చేయాల్సి ఉంది. స్వతంత్ర దేశాలు ఎవరితో ఉండాలన్నది ఆ దేశాలు నిర్ణయించుకుంటాయి. తాము కోరుకున్న దేశాలతో మైత్రిని కొనసాగించవచ్చు. లేకపోతే లేకపోవచ్చు. రష్యా చెప్పినట్లు నడుచుకోవాలంటే ఎలా అన్న ప్రశ్నలు అంతర్జాతీయ సమాజం నుంచి విన్పిస్తున్నాయి.

అమెరికాతో దీటుగా అగ్రరాజ్యంగా ఆవిర్భవించాలన్న తహతహ.. తపనతో రష్యా అధ్యక్షుడు పుతిన్ ఈ యుద్ధానికి సిద్ధమయ్యారన్న ఆరోపణలు అంతర్జాతీయంగా వినిపిస్తున్నాయి. 21వ శతాబ్దంలో యుద్ధాన్ని ఏ దేశం మద్దతివ్వదు. తన సామ్రాజ్యాన్ని విస్తరించడం కోసం పుతిన్ యుద్ధానికి దిగారు. తనను, తన దేశాన్ని ఎవరూ గుర్తించడం లేదన్న ఏకైక కారణంగానే పుతిన్ ఈ యుద్ధానికి దిగారన్నది వాస్తవం.

ఉక్రెయిన్ లో దశాబ్దాల క్రితమే రెఫరెండం నిర్వహించారు. 95 శాతం మంది ప్రజలు తమ దేశం స్వతంత్రంగా ఉండాలని కోరుకున్నారు. ఇన్నేళ్లు మౌనంగా ఉన్న రష్యా ఈ యుద్ధానికి దిగడం కేవలం దురహంకారమేనని అంటున్నారు. నాటోలో సభ్యత్వం కోరడమే ఉక్రెయిన్ చేసిన పాపమా? అన్న ప్రశ్న తలెత్తుతోంది. రష్యా కేవలం ఉక్రెయిన్ ను ఆక్రమించుకోవడానికే ఈ దాడులకు దిగింది. అంతర్జాతీయంగా పుతిన్ తన గౌరవాన్ని కోల్పోయినట్లయిందని రాజకీయ విశ్లేషణలు వెలువడుతున్నాయి. ఒక దురహంకారి, నియంత చేతుల్లో దేశం ఉంటే ఇలాగే ఉంటుంది. యుద్ధానికి పూర్తి స్థాయిలో దిగితే దీర్ఘకాలంలో నష్టపోయేది రష్యా అన్నది గుర్తుంచుకోవాల్సి ఉంటుంది.