టాప్ 10 లేటెస్ట్ తెలుగు న్యూస్

రైతుబంధువును ఆదరించండి.. రాబందులను తరిమికొట్టండి: కేటీఆర్

రైతుబంధు పడకుండా కాంగ్రెస్‌ పార్టీ అడ్డుకుందని ఆరోపించారు మంత్రి కేటీఆర్. రైతుబంధుపై కాంగ్రెస్‌ వక్రబుద్ధి బయటపడిందని.. కాంగ్రెస్‌ ఉంటే కరెంటు ఉండదని.. ధరణిని రద్దుచేసి పట్వారీ వ్యవస్థ మళ్లీ తెస్తామని కాంగ్రెస్‌ నేతలు అంటున్నారన్నారు కేటీఆర్. కరెంటు కావాలా.. కాంగ్రెస్‌ కావాలో ప్రజలు ఆలోచించుకోవాలన్నారు. ధర్మపురిలో బీఆర్‌ఎస్‌ అభ్యర్థి కొప్పుల ఈశ్వర్‌కు మద్దతుగా నిర్వహించిన రోడ్‌ షోలో కేటీఆర్ వ్యాఖ్యానించారు. కాంగ్రెస్‌కు ఓటేస్తే రైతుబంధు తీసేస్తారు.

మద్యం కేసులో చంద్రబాబు నాయుడికి ఊరట

మద్యం కేసులో టీడీపీ అధినేత చంద్రబాబునాయుడికి ఊరట లభించింది. ఈ కేసులో చంద్రబాబు, మాజీ మంత్రి కొల్లు రవీంద్రలపై తొందరపాటు చర్యలు తీసుకోవద్దని హైకోర్టు ఆదేశాలు జారీ చేసింది. సోమవారం ఈ కేసుపై హైకోర్టులో విచారణకు రాగా తీర్పును న్యాయస్థానం రిజర్వ్ చేసింది. గతంలో వాదనలు పూర్తికావడంతో లిఖిత పూర్వక వాదనలు సమర్పించాలని కోర్టు ఆదేశించింది. కోర్టు ఆదేశాల మేరకు ఈరోజు చంద్రబాబు, సీఐడీ తరపు న్యాయవాదులు లిఖిత పూర్వక వాదనలు సమర్పించారు.

Narendra Modi : హైదరాబాద్‌లో మోదీ రోడ్ షో.. మూడు కిలోమీటర్ల మేరకు

ప్రధాని నరేంద్ర మోదీ హైదరాబాద్ లో రోడ్ షో నిర్వహించారు. మూడు కిలోమీటర్ల రోడ్ షోలో ప్రధాని పాల్గొన్నారు. ఆర్టీసీ క్రాస్ రోడ్స్ నుంచి కాచిగూడలోని వీర సావర్కర్ విగ్రహం వరకూ రోడ్ షో నిర్వహించారు. దారి పొడువునా ప్రజలకు అభివాదం చేస్తూ మోదీ కనిపించారు. ఆర్టీసీ క్రాస్ రోడ్స్, నారాయణగూడ, వైఎంసీఏ చౌరస్తా, కాచిగూడ క్రాస్ రోడ్స్ వరకూ మోదీ రోడ్ షో కొనసాగుతుంది. మోదీని చూసేందుకు దారిపొడువునా పెద్దయెత్తున ప్రజలు హాజరయ్యారు.

ఆడుదాం ఆంధ్ర.. ఆడడానికి మీరు సిద్ధమైతే!!

ఏపీలో 'ఆడుదాం-ఆంధ్ర' క్రీడా పోటీల నిర్వహణకు రాష్ట్ర ప్రభుత్వం రిజిస్ట్రేషన్లను ప్రారంభించింది. క్రీడల్లో విజేతలకు ప్రభుత్వం నగదు బహుమతులు ప్రకటించింది. గ్రామ/వార్డు సచివాలయ స్థాయి నుంచి ఐదు దశల్లో పోటీలను నిర్వహించనున్నారు. ప్రతి దశలోనూ క్రీడాకారుల ప్రతిభను వెలికితీయడంతో పాటుగా విజేతలను సర్టిఫికెట్స్, మెమెంటోలు, నగదు పురస్కారాలతో సత్కరించనుంది. 15ఏళ్లు పైబడిన వయసున్న బాలబాలికలు అందరిని పోటీలలో భాగస్వాముల్ని చేసేలా 'ఓపెన్‌ మీట్‌'ను పోటీలు చేపడుతున్నారు.