Fact Check: کانگریس اجلاس میں مودی کی نعرے بازی پرکھڑگے کی برہمی کا گمراہ کن ویڈیو وائرل
سوشل میڈیا پر ایک ویڈیو بڑے پیمانے پر گردش کر رہا ہے کہ کانگریس صدر ملکارجن کھڑگے نے پارٹی پروگرام میں مودی کے نعرے لگانے پر سامعین پر شدید برہمی ظاہر کی
Claim :
کانگریس صدر ملکارجن کھڑگےنے مودی کے نعروں سے اکسائے جانے پر مجمع پر برہمی ظاہر کیFact :
کسی دوسرے پروگرام سے اخذ کردہ مودی موافق نعروں کا آڈیو لیکر وائرل ویڈیو کو ایڈٹ کیا گیا ہے
ان دنوں کانگریس کے قومی صدر ملکارجن کھڑگے کا ایک ویڈیو سوشل میڈیا پر وائرل ہو رہا ہے جس میں انہیں 'مودی' کے نعرے لگائے جانے پر پروگرام میں موجود حاضرین پر برہم انداز اوراونچی آواز میں یہ کہتے ہوئے دیکھا جاسکتا ہے، ' خاموش بیٹھو، اگر آپ سننا نہیں چاہتے تو یہاں سے چلے جائیں۔ ایسی بات نہ کریں۔ کیا آپ نہیں دیکھتے کہ آل انڈیا کانگریس کمیٹی کا لیڈر تقریر کررہا ہے ؟ آپ لوگ جو منہ میں آرہا ہے کہے جارہے ہیں۔ اگر آپ چاہیں تو تقریر سنیں ورنہ جلسہ سے نکل جائیں۔'
انٹرنیٹ صارفین کا دعویٰ ہے کہ کھڑگے نے پروگرام میں مودی کے نعروں سے لوگوں کو اکسائے جانے پر مجمع پر برہمی کا اظہار کیا۔
فیکٹ چیک:
اسی کلپ کا توسیعی ورژن انڈیا ٹوڈے، ٹائمز ناؤ اور اے این آئی نیوز نے یوٹیوب پر اپ لوڈ کیا ہے۔ یہ فوٹیج حالیہ دنوں میں تلنگانہ میں منعقده اسمبلی انتخابات 2023 کے دوران ایک انتخابی ریلی سے لیا گیا ہے۔ اس ویڈیو کا بغور جائزہ لینے پر ہمیں 'مودی کے نعروں' کے بارے میں کوئی تذکرہ نہیں ملتا۔ اس آڈیو کو بعد میں کانگریس لیڈر کے ویڈیو میں شامل کردیا گیا تاکہ اس ویڈیو کلپ کو جھوٹے دعوے کے ساتھ شئیر کیا جاسکے کہ دوران پروگرام مودی کے نعرے لگائے جانے پر کس طرح کھڑگے نے عوام کو برا بھلا کہا۔
نیوز 18 اور انڈیا ٹوڈے جیسے میڈیا کے اداروں نے اپنی رپورٹوں میں کہا ہیکہ پارٹی کے انتخابی وعدوں کا تذکرہ کرتے وقت مجمع کی جانب سے دوران پروگرام شوروغل کے نتیجے میں انکی تقریر میں خلل کے بعد کھڑگے نے اپنا آپا کھو دیا اور لوگوں پر برس پڑے۔ اگرچہ کہ ان رپورٹس میں مخصوص ہنگامہ آرائی کا کوئی خاص ذکر نہیں کیا گیا، لیکن یہ واضح ہوگیا کہ تقریر کے دوران خلل کی وجہ "مودی نعرہ" نہیں تھا۔
بی جے پی IT Cell کے سربراہ امیت مالویہ نے ایکس (سابقہ ٹوئٹر) پر اپنے ایک پوسٹ میں لکھا کہ کھڑگے کے کانگریس صدر ہونے کے باوجود انہیں ہر اجلاس میں ذلت کا سامنا کرنا پڑتا ہے۔ پارٹی کارکنوں کی جانب سے انہیں عزت ومرتبہ نہیں دیا جاتا ہے۔ گاندھی خاندان نے انہیں ربر اسٹامپ صدر بناکر رکھ دیا ہے۔۔
'مودی نعرے' کا اصل آڈیو اس وقت کا ہے جب راجستھان کے سابقہ وزیر اعلی اشوک گہلوت نے میونسپل کونسل کی ایک تقریب میں شرکت کے بعد نوجوانوں کے ایک اجتماع سے بات چیت کرنے کے لیے اپنے قافلے کو روکا تھا۔
اس سے واضح ہوتا ہے کہ کھڑگے کا مودی کے نعروں پر اکسائے جانے کے بعد مجمع پر برہمی ظاہرکرنے کا وائرل ویڈیو گمراہ کن ہے۔ یہ بھی حقیقت ہیکہ کھڑگے دوران پروگرام لوگوں پر اپنی برہمی ظاہر کی تھی، تاہم، اس برہمی کی وجہ مودی کی نعرے بازی نہیں تھی۔
پس اس سے پتہ چلا کہ وائرل پوسٹ میں کیا گیا دعویِٰ گمراہ کن ہے۔
