T20 World Cup 2024 : టీం ఇండియాదే విజయం... ఈ విజయం కోసం కదా పదిహేడేళ్లు చూసింది.. నిరీక్షణ ఫలించిన వేళ
టీ 20 వరల్డ్ కప్ మ్యాచ్ ఫైనల్స్ లో భారత్ విజయం సాధించింది. దక్షిణాఫ్రికాను ఓడించింది. ప్రపంచ కప్ ను సొంతం చేసుకుంది
![T20 World Cup 2024 : టీం ఇండియాదే విజయం... ఈ విజయం కోసం కదా పదిహేడేళ్లు చూసింది.. నిరీక్షణ ఫలించిన వేళ T20 World Cup 2024 : టీం ఇండియాదే విజయం... ఈ విజయం కోసం కదా పదిహేడేళ్లు చూసింది.. నిరీక్షణ ఫలించిన వేళ](https://www.telugupost.com/h-upload/2024/06/30/1634774-inida.webp)
ఓడిపోతామన్న బాధ చాలాసేపు... ఇలా ఎందుకు మనకే జరుగుతుందన్న ఆవేదన... చేతికి వచ్చిన కప్పు చేజారిపోతుందన్న కసి... ఇలా అనేక రకమైన భావాలు నిన్న రాత్రి మ్యాచ్ చూసిన వారికి ఎవరికైనా కలుగుతుంది. మనకు వరల్డ్ కప్ రాత లేదేమో... అందుకే ఇలా దేవుడు స్క్రిప్ట్ ఇలా రాశాడనుకుంటా.. అంటూ నిట్టూర్చిన వాళ్లు కోట్ల మంది.... కానీ అందరి బాధలను తొలగిస్తూ... అందరి కన్నుల నుంచి ఉబికి వస్తున్న కన్నీటిని తుడూస్తూ విక్టరీ... అద్భుతమైన విజయం... ఊహించని విక్టరీ... ఇది కదా మనకు కావాల్సింది. ఎన్నాళ్లకు దక్కింది. పదిహేడేళ్లకు కానీ సాకారం కాలేదు. కలగా మారుతుందని భావించిన విజయం కంటి ముందు సాక్షాత్కరిస్తే.. టీవీ చూసేవాళ్లకు మనకే కంటి వెంట నీరు ఆగలేదు.. ఇక ఆడిన వాళ్ల సంగతి చెప్పగలమా.. ఎట్టకేలకు ప్రపంచ కప్ మన సొంతమయింది. ఊహించని విజయం లభించింది. టీం ఇండియా విశ్వవిజేతగా నిలిచింది. కోట్లాది మంది అభిమానుల గుండెల్లో నెలకొన్న బాధ ఒక్క నిమిషంలో హుష్ కాకి అంటూ ఎగిరిపోయింది.