T20 World Cup : ఆహా ఏమి భాగ్యము... భారత్ ఫైనల్స్ కు...ఇది కదా ఆశించింది.. కసి తీర్చుకున్న ఇండియా

అందరి అంచనాలను రోహిత్ సేన వమ్ము చేయలేదు. వర్షం పడటంతో మ్యాచ్ ఆలస్యంగా ప్రారంభమయింది. టాస్ గెలిచిన ఇంగ్లండ్ తొలుత ఫీల్డింగ్ ఎంచుకుంది. ఈ మైదానంలో ముందు బ్యాటింగ్ చేసిన జట్లే ఎక్కువ సార్లు గెలిచారన్న విషయాన్ని ఇంగ్లండ్ కెప్టెన్ విస్మరించినట్లున్నాడు. అది కూడా ఇండియాకు ప్లస్ అయిందనే చెప్పాలి. తొలుత బ్యాటింగ్ కు దిగిన ఓపెనర్లలో రోహిత్ శర్మ, విరాట్ కోహ్లిలు రెండు ఓవర్లు పరవాలేదనిపించినా, కోహ్లి మరోసారి తక్కువ పరుగులకే అవుట్ అయ్యాడు. ఒక సిక్సర్ బాది మరొక షాట్ కు ప్రయత్నించి వికెట్ ను కోహ్లి సమర్పించుకున్నాడు. ఈ వరల్డ్ కప్ లో కోహ్లి ఆశించనంత మేర ఆడకపోయినా మిగిలిన ఆటగాళ్లు మాత్రం తమ సత్తాను చాటారు.

తర్వాత క్రీజులోకి వచ్చిన రిషబ్ పంత్ కూడా స్వల్ప పరుగులకే వెనుదిరిగాడు. దీంతో సూర్యకుమార్ యాదవ్ వచ్చి రోహిత్ శర్మతో జత కలిశాడు. రోహిత్ శర్మ ఎప్పటిలాగేనే మంచి ఇన్నింగ్స్ ఆడి 57 పరుగులు చేశాడు. సూర్యకుమార్ యాదవ్ 47 పరుగులు చేసి అవుటయ్యాడు. హర్థిక్ పాండ్యా చివరిలో వచ్చి సూపర్ ఇన్నింగ్స్ ఆడాడు. జడేజా కూడా జత కలవడంతో భారత్ ఇరవై ఓవర్లకు ఏడు వికెట్లు కోల్పోయి 171 పరుగులు చేసింది. అయితే 171 పరుగులు లక్ష్యంతో బరిలోకి దిగిన ఇంగ్లండ్ జట్టులో బట్లర్ దూకుడుగా ఆడటంతో కొంత ఆందోళన తలెత్తింది. 23 పరుగులు చేసిన బట్లర్ ను అక్షర్ పటేల్ అవుట్ చేయడంతో ఇక మ్యాచ్ భారత్ వైపు మొగ్గు చూపింది.

ఇంగ్లండ్ బ్యాటర్లు వరస పెట్టి అవుటయ్యారు. సాల్ట్ ఐదు పరుగులకే అవుటయ్యాడు. బెయిర్ స్టో డకౌట్ కాగా, మొయిన్ ఆలీ 8 పరుగుల వద్ద రిషబ్ పంత్ స్టంప్ అవుట్ చేశాడు. దీంతో ఇరవై బాల్స్ మిగిలి ఉండగానే ఇంగ్లండ్ కధ ముగిసింది. భారత్ బౌలర్లలో బుమ్రా ఒకటి, అక్షర్ పటేల్, కులదీప్ చెరి మూడు వికెట్లు తీయడంతో మొత్తం 16.4 ఓవర్లలోనే ఆల్ అవుట్ అయి సెమీ ఫైనల్స్ నుంచి ఇంగ్గండ్ ఇంటి దారి పట్టింది. 2022 వరల్డ్ కప్ సెమీ ఫైనల్స్ లో భారత్ ను ఓడించిన ఇంగ్లండ్ కు భారత్ తన పవరేంటో రుచి చూపించింది. ఇక ఈ నెల 29వ తేదీన సౌతాఫ్రికాతో భారత్ ఫైనల్స్ ఆడనుంది. ఫైనల్స్ లోనూ ఇదే జోరు కొనసాగించాలని భారత్ క్రికెట్ అభిమానులు కోరుకుంటున్నారు. చిరకాల కోరిక వరల్డ్ కప్ ను సాధించాలని ఆశిస్తున్నారు.