థియేటర్ ను ధ్వంసం చేసేసిన విజయ్ అభిమానులు

చెన్నైలోని రోహిణి సిల్వర్ స్క్రీన్స్ థియేటర్‌ ను హీరో విజయ్ అభిమానులు ధ్వంసం చేశారు. విజయ్ కొత్త చిత్రం 'లియో' ట్రైలర్‌ను ప్రదర్శిస్తున్న సందర్భంగా విజయ్ అభిమానులు థియేటర్ లోని సీట్లను విరగ్గొట్టేశారు. లియో ట్రైలర్ కు చూడడానికి వందలాది మంది విజయ్ అభిమానులు థియేటర్ లోపలికి వచ్చారు. కెపాసిటీ మించి అభిమానులను లోపలికి పంపించారు. ట్రైలర్ స్క్రీనింగ్ తర్వాత థియేటర్ లోపల చూస్తే చాలా వరకూ సీట్లు విరిగిపోయాయి. థియేటర్ యజమానులు ముందుగా పార్కింగ్ ఏరియాలో ట్రైలర్‌ను చూపించాలని అనుకున్నారు. అయితే అవుట్‌డోర్ స్క్రీనింగ్ కు అనుమతి లేకపోవడంతో పోలీసుల సెక్యూరిటీ మధ్య థియేటర్ లోపల స్క్రీనింగ్ నిర్వహించారు. విజయ్ బొమ్మ ఉన్న జెండాలతో థియేటర్ లో అభిమానులు రెచ్చిపోయారు. థియేటర్ దుస్థితికి సంబంధించిన వీడియోలు వైరల్ అవుతున్నాయి.