ఈ ప్రాంతాల్లో వర్షాలే..!

తెలంగాణలో వచ్చే మూడు రోజులు వర్షాలు కురుస్తాయని హైదరాబాద్ వాతావరణ కేంద్రం వెల్లడించింది. రాష్ట్రవ్యాప్తంగా పలు ప్రాంతాల్లో తేలికపాటి నుంచి ఓ మోస్తరు వర్షాలు కురిసే అవకాశం ఉందని తెలిపింది. బంగాళాఖాతంలో ఏర్పడిన అల్పపీడన ప్రభావం వల్ల రాష్ట్రంలో వర్షాలు పడతాయని చెప్పింది. నిజామాబాద్‌, కామారెడ్డి, జగిత్యాల, సిరిసిల్ల, మెదక్‌, వికారాబాద్, సంగారెడ్డి, యాదాద్రి భువనగిరి, నల్గొండ జిల్లాల్లోని కొన్ని ప్రాంతాల్లో వర్షాలు కురుస్తాయని చెప్పారు. కరీంనగర్‌, ములుగు, వరంగల్‌, ఆదిలాబాద్‌ జిల్లా, నిర్మల్‌, మంచిర్యాల, నల్గొండ, మహబూబాబాద్‌, జగిత్యాల, వికారాబాద్‌ జిల్లాల్లోనూ భారీ వర్షాలు కురిశాయి. భద్రాద్రి కొత్తగూడెం జిల్లా దుమ్ముగూడెంలో 120.4 మిల్లీమీటర్ల వర్షపాతం కురిసినట్లు వాతావరణశాఖ అధికారులు వెల్లడించారు. ఆసిఫాబాద్ జిల్లాలో 115 మిల్లీ మీటర్లు , కామారెడ్డి జిల్లాలో 64.5 మిల్లీమీటర్లు, రంగారెడ్డి జిల్లా పెద్దషాపూర్‌లో 42 మి.మీ, నిజామాబాద్‌ జిల్లా కమ్మర్‌పల్లిలో 37.3 మి.మీ, భూపాలపల్లి జిల్లా పెద్దంపేటలో 32.5 మి.మీ వర్షపాతం నమోదైంది.