వైజాగ్ ఎయిర్ పోర్టు.. నాలుగు నెలలు ఆంక్షలే

రన్‌వే పునరుద్ధరణ కోసం ఆంధ్రప్రదేశ్‌లోని విశాఖపట్నం అంతర్జాతీయ విమానాశ్రయం నుండి రాత్రి సమయంలో విమానాలు నాలుగు నెలలకు పైగా నిలిపివేయనున్నారు. విశాఖపట్నం విమానాశ్రయంలో రాత్రివేళ విమాన సర్వీసులు నిలిచిపోనున్నాయి. వైజాగ్ ఎయిర్​పోర్టు భారత నావికాదళం అధీనంలో ఉన్న సంగతి తెలిసిందే. నేవీకి సంబంధించిన యుద్ధ విమానాలు, ఎయిర్​క్రాఫ్ట్​లు ఐఎన్​ఎస్ డేగా రన్​వే నుంచే కార్యకలాపాలు సాగిస్తాయి. పౌర విమానాల ల్యాండింగ్, టేకాఫ్ కూడా ఈ రన్​ వే మీదుగానే జరుగుతాయి. నావికాదళం ప్రతి పదేళ్లకు ఓసారి తమ రన్​వేలకు రీ-సర్ఫేసింగ్ పనులను చేపడుతుంది. ఇందులో భాగంగా రన్​వేపై మూడు పొరల్ని తొలగించి మళ్లీ కొత్తగా వేస్తారు. ఐఎన్ఎస్ డేగాలో 2019లో రీ-సర్ఫేసింగ్ నిర్వహించాల్సి ఉంది. ఈ నేపథ్యంలో ఈ ఏడాది నవంబర్ 15 నుంచి మార్చి నెలాఖరు దాకా రీ-సర్ఫేసింగ్ చేయాలని అధికారులు నిర్ణయించారు.