ఉద్యోగుల జీతాలు ఇంకా పెరుగుతాయ్

అధికారుల సహకారంతోనే తెలంగాణలో అభివృద్ధి సాధ్యమయిందని చెప్పారు. జనగామలో ఇలాంటి భవనాన్ని చూడగలుతామని మనం భావించామా? అని ఆయన అన్నారు. జనగామలో మూడు ఎకరాల వ్యవసాయ భూమి ఉంటే కోటీశ్వరుడని కేసీఆర్ అన్నారు. అన్ని శాఖల ఉద్యోగులు చేసిన శ్రమ వల్లనే ఇది సాధ్యమయిందన్నారు. తెలంగాణ వచ్చిన తర్వాత ప్రజల జీవన ప్రమాణాలు పెరుగుతాయని చెప్పానన్నారు.

తెలంగాణ ఉద్యోగుల జీతాలు కూడా ఇంకా పెరుగుతాయని కేసీఆర్ చెప్పారు. వచ్చిన డబ్బు ఏం చేసుకుంటాం. పనిచేసిన వారికే పంచి పెడతామని ఆయన చెప్పారు. కరెంట్ కనురెప్పపాటు పోకుండా విద్యుత్తు ఉద్యోగులు పనిచేస్తున్నారన్నారు. విద్యుత్తు ఉద్యోగులు రేయింబవళ్లూ కష్టపడి పనిచేస్తున్నారని కేసీఆర్ కితాబిచ్చారు. అన్ని రంగాల్లో తెలంగాణలో అభివృద్ధి చెందిందన్నారు. ఉద్యోగులు ప్రభుత్వంలో భాగమేనని, మారుమూల ప్రాంతాలు కూడా అభివృద్ధి చెందాలని కేసీఆర్ పిలుపునిచ్చారు. ప్రజల జీవన ప్రమాణాలు మరింత పెరుగుతాయని చెప్పారు.