ଫ୍ୟାକ୍ଟ ଚେକ୍: ମୂଳ ଭିଡିଓରେ ନରେନ୍ଦ୍ର ମୋଦି ସେସମୟରେ ଥିବା କେନ୍ଦ୍ର ସରକାରଙ୍କୁ ଆକ୍ଷେପ କରି ଏପରି କହିଛନ୍ତି
ମୂଳ ଭିଡିଓରେ ନରେନ୍ଦ୍ର ମୋଦି ସେସମୟରେ ଥିବା କେନ୍ଦ୍ର ସରକାରଙ୍କୁ ଆକ୍ଷେପ କରି ଗୋମାଂସ ରପ୍ତାନୀ କଥା କହିଛନ୍ତି ।;
In the original video, Narendra Modi was criticizing the central government in power at that time while making this statement.
ଗୋରକ୍ଷା ଆଇନ ପ୍ରଣୟନ ପାଇଁ ଅଣ୍ଟା ଭିଡିଲା ବିଶ୍ଵ ହିନ୍ଦୁ ପରିଷଦ । ଗୋ-ହତ୍ୟା ନିଷେଧ ଓ ଗୋ-ସଂରକ୍ଷଣ ବିଲ-୨୦୨୪କୁ ପାରିତ ଦାବି ନେଇ ଭୁବନେଶ୍ବର ଗାନ୍ଧୀମାର୍ଗରେ ମହାସମାବେଶ । ଗୋ ଚାଲାଣ, ଗୋ ହତ୍ୟା, ଗୋ ମାଂସ ଚାଲାଣ ଉପରେ ରୋକ୍ ଲଗାଇବା ସହ ଏଥିରେ ନିୟୋଜିତ ଥିବା ଲୋକଙ୍କ ବିରୁଦ୍ଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ଦାବି କରାଯାଇଛି । ୩ ଦଫା ଦାବି ନେଇ ଭୁବନେଶ୍ୱରରେ ମିଳିତ ଗୋରକ୍ଷା ସମାବେଶ । ଏହି ସମାବେଶରେ ଶହ ଶହ ଗୋ ରକ୍ଷକ ବା ସୋ ସେବକ ଯୋଗଦେଇ ଗାନ୍ଧୀମାର୍ଗରେ ଗୋମାତାଙ୍କ ପାଇଁ ସ୍ୱତନ୍ତ୍ର ବିଲ ପାରିତ ଦାବି କରିଛନ୍ତି । ବିଧାନସଭାରେ ଓଡିଶାରେ ଗୋ ହତ୍ୟା ନିଷେଧ ଓ ଗୋ ସଂରକ୍ଷଣ ବିଲ ୨୦୨୪କୁ ପାରିତ କରିବା ଦାବି ନେଇ ଆଜି ଗୋ ସେବକ, ସାଧୁ ସନ୍ଥ ଏକାଠି ହୋଇଥିଲେ । ବିଶ୍ୱ ହିନ୍ଦୁ ପରିଷଦ, ବଜରଙ୍ଗ ଦଳ ସମେତ ଅନେକ ହିନ୍ଦୁ ସଂଗଠନର ମିଳିତ ଉଦ୍ୟମରେ ୫ ହଜାରରୁ ଅଧିକ ହିନ୍ଦୁ ସମାବେଶରେ ସାମିଲ ହୋଇଥିଲା ।
ଇତିମଧ୍ୟରେ ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ଭାଇରାଲ ଭିଡିଓରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଛନ୍ତି ଗୋମାଂସ ରପ୍ତାନୀରେ ଭାରତ ଏକ ନମ୍ବର ଅଟେ ।
ଦେଶରେ ଗୋ ସୁରକ୍ଷା ପାଇଁ ବିଭିନ୍ନ ଆଡୁ ଆନ୍ଦୋଳନ ଚାଲୁଥିବା ବେଳେ ପ୍ରଧାନମନ୍ତ୍ରୀ ଏଭଳି ମନ୍ତବ୍ୟ ଦେଇ ଗର୍ବିତ ମନେକରୁଛନ୍ତି ବୋଲି ଦାବି ହୋଇଛି ।
ଉକ୍ତ ଭିଡିଓକୁ ସୋସିଆଲ ମିଡିଆରେ ସେୟାର କରି ୟୁଜର୍ସ ଲେଖିଛନ୍ତି, ଆଜି ହିନ୍ଦୁତ୍ବ ର ଦ୍ୱାହି ଦେଇ ଗୋ ରକ୍ଷକ ଭାଇ ମାନେ ଭୁବନେଶ୍ବର ରେ ରଣ ହୁଙ୍କାର ଡାକରା ଦେଇଥିଲେ କିନ୍ତୁ ସେମାନେ କଣ ଜାଣିଛନ୍ତି ସିଏ ଯାହାଙ୍କ ବଳରେ ଡ଼ିଆଁ ମାରୁଛନ୍ତି ସିଏ ନିଜ ଛାଇ ର ନୁହେଁ ବୋଲି I
ଯାହାର ସ୍କ୍ରିନସଟ୍ ତଳେ ଉପଲବ୍ଧ ରହିଛି ।
ସତ୍ୟାସତ୍ୟ:
ଦାବିଟି ବିଭ୍ରାନ୍ତିକର, ଉକ୍ତ ଭିଡିଓଟି ବହୁ ପୁରୁଣା । ସେସମୟରେ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ନଥିଲେ । ମୂଳ ଭିଡିଓରେ ସେସମୟର କେନ୍ଦ୍ର ସରକାରଙ୍କୁ ସମାଲୋଚନା କରି ନରେନ୍ଦ୍ର ମୋଦି ଏଭଳି ମନ୍ତବ୍ୟ ଦେଇଛନ୍ତି ।
ତଦନ୍ତ କରିବାକୁ ଯାଇ, ଭାଇରାଲ ଭିଡିଓର କିଛି ଅଂଶକୁ ରିଭର୍ସ ଇମେଜରେ ଅନୁସନ୍ଧାନ କରିବାରୁ ସୋସିଆଲ ମିଡିଆରେ ଅପଲୋଡ଼ ହୋଇଥିବା କିଛି ଭିଡିଓ ହସ୍ତଗତ ହୋଇଥିଲା ।
୨୨ ଅକ୍ଟୋବର ୨୦୨୩ରେ ଆଇ ସପୋର୍ଟ ନରେନ୍ଦ୍ର ମୋଦି ନାମକ ଏକ ୟୁଟ୍ୟୁବ ଚ୍ୟାନେଲରେ ଏକ ଭିଡିଓ ଅପଲୋଡ଼ ହୋଇଥିବାର ଦେଖିବାକୁ ମିଳିଛି । ଉକ୍ତ ଭିଡିଓକୁ ବର୍ତ୍ତମାନ ସୁଦ୍ଧା ୯ଲକ୍ଷ ୮୦ହଜାର ୮୬୮ ଭିୟୁ ମିଳିଥିବା ବେଳେ, ୮ ହଜାର ୯ସହ ରୁ ଉର୍ଦ୍ଧ୍ବ ଲାଇକ ମିଳିଛି । ୫ମିନିଟ ୪୯ସେକେଣ୍ଡର ଉକ୍ତ ଭିଡିଓର ୩୬ ସେକେଣ୍ଡ ସମୟରେ ଭାଇରାଲ ହେଉଥିବା ଭିଡିଓର ଅଂଶ ଥିବାର ଦେଖିବାକୁ ମିଳିଛି ।
ତେବେ ପରେପରେ ମୋଦି ଆହୁରି ମଧ୍ୟ କହିଛନ୍ତି, ଦେଖନ୍ତୁ କେଉଁ ବିଷୟ ପାଇଁ ଭାରତ ନିଜକୁ ଗର୍ବିତ ଭାବୁଛି । ଭାଇ ଓ ଭଉଣୀ ମାନେ ଏକଥା ଶୁଣି ଆପଣଙ୍କ ହୃଦୟ କାନ୍ଦୁଛି କି ନାହିଁ ମୁଁ କହିପାରିବି ନାହିଁ ହେଲେ ମୋ ହୃଦୟ କାନ୍ଦୁଛି ।
ସେହିପରି ଆଉକିଛି ୟୁଟ୍ୟୁବ ଚ୍ୟାନେଲରେ ମଧ୍ୟ ଉକ୍ତ ଭିଡିଓ ଅପଲୋଡ଼ ହୋଇଥିବାର ଦେଖିବାକୁ ମିଳିଛି ।
ଅନ୍ୟପଟେ ନରେନ୍ଦ୍ର ମୋଦିଙ୍କ ଅଫିସିଆଲ ୟୁଟ୍ୟୁବ ଚ୍ୟାନେଲରେ ମଧ୍ୟ ୨୩ ନଭେମ୍ବର ୨୦୧୨ରେ ଉକ୍ତ ଭିଡିଓଟି ଅପଲୋଡ଼ ହୋଇଥିବାର ଦେଖିବାକୁ ମିଳିଛି ।
ଏଥିରୁ ଜଣାଯାଇଛି ଯେ, ଉକ୍ତ ଭିଡିଓଟି ଅନ୍ୟୁନ୍ୟ ୨୦୧୨ ମସିହାରୁ ଇଣ୍ଟରନେଟରେ ଉପଲବ୍ଧ ରହିଛି ଏବଂ ମୂଳ ଭିଡିଓରେ ସେସମୟର କେନ୍ଦ୍ର ସରକାରଙ୍କୁ ସମାଲୋଚନା କରି ନରେନ୍ଦ୍ର ମୋଦି ଏଭଳି ମନ୍ତବ୍ୟ ଦେଇଛନ୍ତି ।
ଯେତେବେଳେ ଆମେ ୨୦୧୨ ମସିହାରେ କେଉଁ ପାର୍ଟି କେନ୍ଦ୍ରରେ ସରକାର ଚଳାଉଥିଲା ସର୍ଚ୍ଚ କରିବାରୁ, ସେସମୟରେ କଂଗ୍ରେସ ସରକାର ଥିଲା ଏବଂ ମନମୋହନ ସିଂହ ପ୍ରଧାନମନ୍ତ୍ରୀ ଥିଲେ ବୋଲି ଏକ ଖବରରୁ ଜଣାପଡିଥିଲା ।
ଦେଶ ଗୁଜରାଟ ନାମକ ଏକ ୱେବସାଇଟ ମଧ୍ୟ ଉକ୍ତ ଭିଡିଓ ଅପଲୋଡ଼ କରି ଏକ ଖବର ପ୍ରସାରିତ କରିଥିଵାର ଦେଖିବାକୁ ମିଳିଛି ।
ତେବେ ଉକ୍ତ କାର୍ଯ୍ୟକ୍ରମ ନେଇ ଅନ୍ୟ କୌଣସି ଗଣମାଧ୍ୟମରେ କୌଣସି ପ୍ରସାରିତ ଖବର ଆମର ହସ୍ତଗତ ହୋଇନାହିଁ ।
ନରେନ୍ଦ୍ର ମୋଦିଙ୍କ ଅଫିସିଆଲ ୟୁଟ୍ୟୁବ ଚ୍ୟାନେଲରେ ଅପଲୋଡ଼ ହୋଇଥିବା ଭିଡିଓକୁ ଅନୁଧ୍ୟାନ କରି ପ୍ରମାଣିତ ହେଲା ଯେ, ଦାବିଟି ବିଭ୍ରାନ୍ତିକର । ମୂଳ ଭିଡିଓରୁ କିଛି ଅଂଶକୁ ଏଡିଟ୍ କରି ଭାଇରାଲ କରାଯାଇଛି ।
ମୂଳ ଭିଡିଓରେ ନରେନ୍ଦ୍ର ମୋଦି ସେସମୟରେ ଥିବା କେନ୍ଦ୍ର ସରକାରଙ୍କୁ ଆକ୍ଷେପ କରି ଗୋମାଂସ ରପ୍ତାନୀ କଥା କହିଛନ୍ତି ।