ఘోర ప్రమాదం.. 25 మంది సజీవ దహనం

మహారాష్ట్రలోని బుల్దానాలోని సమృద్ధి మహామేరీ ఎక్స్‌ప్రెస్‌వేపై శనివారం ఉదయం ఘోర ప్రమాదం చోటు చేసుకుంది. 32 మంది ప్రయాణికులతో వెళ్తున్న బస్సులో మంటలు చెలరేగడంతో 25 మంది మరణించారు. పలువురు గాయపడ్డారు. ఈ సంఘటన తెల్లవారుజామున 2 గంటల ప్రాంతంలో జరిగింది. క్షతగాత్రులను బుల్దానా సివిల్ ఆసుపత్రికి తరలిస్తున్నట్లు డిప్యూటీ ఎస్పీ బాబూరావు మహాముని తెలిపారు. “బస్సు నుండి 25 మృతదేహాలను వెలికితీశారు. బస్సులో మొత్తం 32 మంది ప్రయాణిస్తున్నారు. 6-8 మంది గాయపడ్డారు. గాయపడిన వారిని బుల్దానా సివిల్ ఆసుపత్రికి తరలిస్తున్నారు” అని మహాముని చెప్పారు. బస్సు డ్రైవర్ ప్రాణాలతో బయటపడ్డాడు. బస్సు టైరు పగిలిపోవడంతో అది బోల్తా కొట్టింది.. ఆ తర్వాత మంటలు చెలరేగడంతో అందులోని ప్రయాణీకులు సజీవ దహనం అయ్యారని బుల్దానా ఎస్పీ సునీల్ కడసానే తెలిపారు.