దొంగగా మారిన ఆర్టీసీ డ్రైవర్.. అలా దొరికిపోయాడు

బస్సుల్లో ప్రయాణాలు చేస్తున్నప్పుడు ఏదైనా ముఖ్యమైన లగేజీ ఉంటే మన ఒళ్ళో పెట్టుకోవడమో.. లేదా డ్రైవర్ దగ్గర పెట్టడమో చేస్తూ ఉంటాం. ఎందుకంటే ఆ డ్రైవర్ మనకు కాస్త సెక్యూరిటీగా ఉంటాడనే నమ్మకం. అయితే ఆ డ్రైవర్ కాస్తా దొంగగా మారిపోతే!! అలాంటి ఘటన ఒకటి తెలంగాణలో చోటు చేసుకుంది.

ప్రయాణికురాలి బ్యాగ్ నుంచి బంగారం దొంగతనం చేస్తూ ఆర్టీసీ బస్ డ్రైవర్ అడ్డంగా దొరికిపోయాడు. దొంగతనం చేస్తుండగా ఓ ప్రయాణికుడు తన సెల్‌ఫోన్‌లో వీడియో తీసి సామాజిక మాధ్యమాల్లో షేర్ చేశాడు. నిజామాబాద్ నుంచి వరంగల్ వస్తున్న ఆర్టీసీ బస్సులో ఈ ఘటన చోటు చేసుకుంది. వీడియో తమ దృష్టికి వచ్చిన వెంటనే డ్రైవర్‌ను విధుల నుంచి తొలగించినట్టు తెలంగాణ ఆర్టీసీ అధికారులు ధృవీకరించారు. ఓ ప్రయాణికుడు ఈ ఘటనను చిత్రీకరించడంతో డ్రైవర్ మొదట బుకాయించాడు. బ్యాగు నుంచి బంగారం కిందపడిందని చెప్పుకొచ్చాడు. చివరికి వీడియో ఉందని చూపించడంతో నీళ్లు నమిలాడు.