ఎల్లుండి హైదరాబాద్‌కు మోదీ
ఎల్లుండి ప్రధాని మోదీ హైదరాబాద్‌కు రానున్నారు. సికింద్రాబాద్ రైల్వే స్టేషన్ ఆధునికీకరణ పనులకు శంకుస్థాపన చేయనున్నారు
ఎల్లుండి ప్రధాని నరేంద్ర మోదీ హైదరాబాద్‌కు రానున్నారు. సికింద్రాబాద్ రైల్వే స్టేషన్ ఆధునికీకరణ పనులకు శంకుస్థాపన చేయనున్నారు. సుమారు 700 కోట్లతో సికింద్రాబాద్ రైల్వే స్టేషన్ ఆధునికీకరణ పనులు చేపడతారు. ప్రధాని శంకుస్థాపన చేసిన వెంటనే పనులు ప్రారంభమవుతాయని దక్షిణ మధ్య రైల్వే అధికారులు తెలిపారు. రెండేళ్ల వరకూ ఈపనులు కొనసాగే అవకాశముందని వారు చెబుతున్నారు. అత్యాధునికంగా సికింద్రాబాద్ రైల్వే స్టేషన్ ను తీర్చిదిద్దనున్నామని రైల్వే శాఖ అధికారులు తెలియజేశారు. ఇప్పటికే ప్రధాని పర్యటనకు సంబంధించిన అన్ని ఏర్పాట్లు అధికారులు పూర్తి చేశారు.
బహిరంగ సభలో...
సికింద్రాబాద్ రైల్వే స్టేషన్ ఆధునికీకరణ పనులకు శంకుస్థాపన చేసిన అనంతరం ప్రధాని మోదీ భారీ బహిరంగసభలో పాల్గొననున్నారు. ప్రధానితో పాటు కేంద్రమంత్రులు కూడా ఈ సభకు హాజరు కానున్నారు. బండి సంజయ్‌పై ప్రశ్నాపత్రాల లీకేజీ కేసు, కల్వకుంట్ల కవితపై ఢిల్లీ లిక్కర్‌ స్కామ్‌లో కేసు నమోదయిన నేపథ్యంలో ప్రధాని మోదీ పర్యటన ఎలా జరుగుతుంది? ఆయన ప్రసంగంలో విమర్శలు ఎలా ఉండబోతున్నాయన్న దానిపై ఆసక్తి నెలకొంది. బీఆర్ఎస్ ను టార్గెట్ చేస్తూ ప్రధాని మోదీ ప్రసంగం కొనసాగే అవకాశముందని పార్టీ వర్గాలు చెబుతున్నాయి. ఇక్కడ నుంచి కర్ణాటక, తమిళనాడుకు ప్రధాని మోదీ వెళ్లనున్నారని తెలిసింది.