Chandrababu : పార్టీని తెలంగాణలో బలోపేతం చేస్తాం...నాకు తెలుగు ప్రజలు ఎక్కడున్నా ఒక్కటే
తెలంగాణలో పార్టీని బలోపేతం చేయాలని కార్యకర్తలు కోరుతున్నారని టీడీపీ అధినేత చంద్రబాబు అన్నారు.
తెలంగాణలో పార్టీని బలోపేతం చేయాలని కార్యకర్తలు కోరుతున్నారని టీడీపీ అధినేత చంద్రబాబు అన్నారు. ఎన్టీఆర్ ట్రస్ట్ భవన్ లో ఆయన మాట్లాడుతూ ఒకప్పుడు తెలంగాణలో బలమైన నాయకత్వం, క్యాడర్ ఉన్న పార్టీ తెలుగుదేశం అని, కొన్ని కారణాల వల్ల నేతలు పార్టీని వదలి వెళ్లిపోయారన్నారు. రెండు రాష్ట్రాల మధ్య సమస్యలను పరిష్కరించుకోవాలని అన్నారు. రెండు ప్రాంతాల ప్రజల మనోభావాలను గుర్తించి నడుచుకోవాలని చంద్రబాబు అన్నారు. 2047 నాటికి ప్రపంచంలోనే తెలుగు ప్రజలు నెంబర్ వన్ గా ఉండాలని పనిచేస్తున్నామన్నారు. ఏపీలో గత ఐదేళ్లలో విధ్వంసం జరిగిందన్నారు. అక్కడకానీ, ఇక్కడ కానీ తెలుగు జాతి బాగుండాలని తాను కోరుకుంటున్నానని అన్నారు.
పుట్టింది తెలంగాణలోనే...
తెలుగుదేశం పార్టీ తెలంగాణలోనే పుట్టిందని చంద్రబాబు అన్నారు. తెలంగాణలో పార్టీని బలోపేతం చేయడానికి అవసరమైన అన్ని చర్యలు తీసుకుంటామని తెలిపారు. తెలంగాణలో మనం చేసిన అభివృద్ధి మనకు తిరిగి విజయాలను తెచ్చిపెడుతుందన్నారు. తెలుగుదేశం పార్టీ తెలుగువాళ్ల పార్టీ, తెలుగు జాతి కోసం పుట్టిన పార్టీ అని, కొందరు రాజకీయం కోసం ఎన్ని విమర్శలు చేసినా వాటిని పట్టించుకునే అవసరం లేదన్నారు. మంచి ఎప్పుడూ మంచిగానే ఉంటుందని, తెలంగాణలో మళ్లీ బాగుపడాలంటే, ఆరోజు మనం వేసిన పునాదులను తర్వాత వచ్చిన ముఖ్యమంత్రులు దానిని ముందుకు తీసుకెళ్లారన్నారు. తెలంగాణలో ఉన్న తెలుగు వారికి కూడా న్యాయం చేసేందుకు కృషి చేస్తానని తెలిపారు.