పోలవరం పై నిమ్మల తాజాగా ఏం చెప్పారంటే?

గత ప్రభుత్వమే స్టేజి -1,స్టేజి -2 అంటూ ప్రాజెక్ట్ ఎత్తు 41.15 మీట‌ర్ల‌కు ఒప్పుకుంటూ, కేంద్రానికి ప్ర‌తిపాద‌న‌లు పంపిందని, 2023 మార్చిలో వైసీపీ ప్రభుత్వం 41.15 మీటర్ల ఎత్తుకు లోబడి రూ.36,449 కోట్ల రివైజ్ కాస్ట్ కమిటీ ప్రతిపాదనలు కేంద్రానికి పంపిందని నిమ్మల రామానాయుడు సభకు వివరించారు. ఎన్డిఏ ప్ర‌భుత్వం పోల‌వ‌రం ప్రాజెక్టును పూర్తి స్దాయిలో 45.72 మీట‌ర్ల ఎత్తులో నీటిని నిల్వ చేసేందుకు క‌ట్టుబడి ఉందన్నారు. అధికారంలోకి రాగానే అయిదురోజుల‌కే ముఖ్యమంత్రి చంద్రబాబు పోల‌వ‌రం సంద‌ర్శించారంటే ప్రాజెక్టుకు ఎంత ప్రాధాన్య‌త ఇస్తున్నారో గ‌మ‌నించాలని నిమ్మల అన్నారు. గ‌త అయిదేళ్ళ పాల‌న‌లో కేంద్రం రూ. 8,382 కోట్లు రీయంబ‌ర్స్ చేస్తే,3,385 కోట్లు ప్రాజెక్టుకు ఖ‌ర్చుపెట్ట‌కుండా దారి మ‌ళ్ళించిన దుర్మార్గ ప్ర‌భుత్వం వైసిపిది అంటూ నిమ్మల రామానాయుడు ధ్వజమెత్తారు. ముఖ్య‌మంత్రి చంద్ర‌బాబు కేంద్రంతో సంప్రదింపులు చేసి 12,250 కోట్లు నిధులు తీసుకువచ్చారన్న రామానాయుడు వ‌చ్చే జ‌న‌వ‌రి నుండి డయాఫ్రమ్ వాల్ పనులు మొదలు పెట్టి,సమాంతరంగా ఈసీఆర్ఎఫ్ పనులు చేపట్టి ప్రాజెక్ట్ ను త్వరితగతిన పూర్తి చేస్తామని తెలిపారు.