మంత్రి బొత్స వ్యాఖ్యల దుమారం.. ఫైర్‌ అవుతున్న తెలంగాణ మంత్రులు

ప్రశ్నాపత్రం లీకేజీలు, జవాబు పత్రాల దిద్దుబాటులో అవకతవకలు వంటి అనేక సవాళ్లను తెలంగాణ విద్యావ్యవస్థ ఇటీవలి సంవత్సరాలలో ఎదుర్కొంది. తాజాగా ఈ విషయాలపై ఆంధ్రప్రదేశ్ పర్యాటక శాఖ మంత్రి బొత్స సత్యనారాయణ స్పందిస్తూ తెలంగాణ విద్యాశాఖను కించపరుస్తూ వివాదాస్పద వ్యాఖ్యలు చేశారు. విజయవాడలో జరిగిన ఐఐఐటీ ప్రవేశ పరీక్ష ఫలితాల ప్రకటన సందర్భంగా బొత్స మాట్లాడుతూ.. తెలంగాణ కంటే ఏపీ విద్యావ్యవస్థ ఎంతో ఉన్నతంగా ఉంది. తెలంగాణలో పేపర్ లీకేజీ స్కామ్‌లు, అక్రమాలు జరుగుతున్నాయి. తెలంగాణ విద్యావ్యవస్థను ఆంధ్రప్రదేశ్‌తో పోల్చలేమని, ప్రమాణాలను మెరుగుపరచడానికి, నాణ్యమైన విద్యను అందించడానికి ఏపీలో సమర్థ ప్రభుత్వం కట్టుబడి ఉందని ఉద్ఘాటించారు.

తెలంగాణలో చూచి రాతలు, కుంభకోణాలు రోజూ చూస్తున్నామన్నారు. ఇక ఉపాధ్యాయుల బదిలీలు కూడా చేసుకోలేని దుస్థితి తెలంగాణది అని అన్నారు. మన విధానం మనది.. మన ఆలోచనలు మనవి అని బొత్స పేర్కొన్నారు. బొత్స చేసిన వ్యాఖ్యలు తెలంగాణ నేతల నుంచి రియాక్షన్‌కు దారితీశాయి. రెండు తెలుగు రాష్ట్రాల మధ్య పోలికలు రావడం ఇదే మొదటి సారి కాదు. ఏపీ మంత్రి బొత్సకు తెలంగాణ మంత్రి శ్రీనివాస్ గౌడ్ స్ట్రాంగ్ కౌంటర్ ఇచ్చారు. పదే పదే రెచ్చగొట్టే వ్యాఖ్యలు చేయడం సరికాదని, గతంలో కూడా ఇలాగే రెచ్చగొట్టే వ్యాఖ్యలు చేశారని మండిపడ్డారు. ఏ రాష్ట్రం ఎంత డెవలప్‌ అయ్యిందో ప్రజలకు తెలుసన్నారు. బొత్స బాధ్యతాయుతమైన వ్యక్తిగా మాట్లాడలేదన్నారు. స్కామ్ లు చేసింది వాళ్లేనని, హైదరాబాద్‌కు రాకపోతే వాళ్లకు పూట గడవదంటూ మంత్రి శ్రీనివాస్‌గౌడ్‌ ఎద్దేవా చేశారు.

రాజధాని కూడా లేని రాష్ట్రం ఏపీ అంటూ ఘాటు వ్యాఖ్యలు చేశారు. బదిలీల పేరుతో వీళ్లు దందాలు నడిపారన్నారు. టీఎస్పీఎస్సీలో పూర్తి స్థాయి విచారణ కొనసాగుతుందన్నారు. మంత్రి బొత్స వ్యాఖ్యలపై తెలంగాణకు చెందిన మరో మంత్రి గంగుల కమలాకర్ మండిపడ్డారు. తెలంగాణ విద్యావ్యవస్థలో కేరళను మించిపోయిందన్నారు. టీఎస్పీఎస్సీలో కుంభకోణాన్ని బయటపెట్టిందని తమ ప్రభుత్వమేనని చెప్పారు. తప్పు చేసిన వారిని శిక్షిస్తామని చెప్పారు. ఆంధ్రప్రదేశ్‌కి ఒక్కటైనా అవార్డు వచ్చిందా అని ప్రశ్నించారు. తన వ్యాఖ్యలపై బొత్స స్పందించాలన్నారు. స్పందించిన తరువాతే బొత్స హైదరాబాద్‌లో అడుగుపెట్టాలన్నారు. పక్క రాష్ట్రం బాగుండాలని తాము కోరుకుంటున్నామన్నారు. తెలంగాణలో 1,009 గురుకులాలు ఉంటే, ఏపీలో కేవలం 305 గురుకులాలే ఉన్నాయని అన్నారు.

బొత్స వ్యాఖ్యలకు ముందు, తెలంగాణ ఆర్థిక మంత్రి హరీశ్ రావు ఏపీ కార్మికులను తెలంగాణకు వలస రావాలని కోరారు, ఫలితంగా తెలంగాణ రాష్ట్ర సమితి (టిఆర్‌ఎస్), యువజన శ్రామిక రైతు కాంగ్రెస్ పార్టీ (వైఎస్‌ఆర్‌సిపి) నాయకుల మధ్య తీవ్ర వాగ్వాదం జరిగింది. అయితే, కాలక్రమేణా ఉద్రిక్తతలు సద్దుమణిగాయి. ఏదైనా రాష్ట్ర భవిష్యత్తును రూపొందించడంలో విద్య కీలక పాత్ర పోషిస్తుంది. నేర్చుకోవడం, అభివృద్ధికి అనుకూలమైన వాతావరణాన్ని అందించడానికి ప్రభుత్వాలు పని చేయడం చాలా కీలకం. సవాళ్లను పరిష్కరించడం ద్వారా, నిరంతర అభివృద్ధి కోసం కృషి చేయడం ద్వారా, తెలంగాణ, ఆంధ్రప్రదేశ్ రెండూ తమ తమ విద్యా వ్యవస్థల సమగ్ర అభివృద్ధికి, పురోగతికి దోహదపడతాయి.