Tirumala : కిటకిటలాడుతున్న తిరుమల వీధులు... క్యూలైన్ ఎంత పొడవు ఉందంటే?

వరసగా మూడు రోజుల నుంచి తిరుమలలో భక్తుల రద్దీ కొనసాగుతుంది. హుండీ ఆదాయం కూడా భారీగానే పెరిగింది. ఈరోజు తిరుమలలోని వైకుంఠం క్యూ కాంప్లెక్స్‌లోని అన్ని కంపార్ట్‌మెంట్లు నిండిపోయి భక్తుల క్యూ లైన్ బయట కృష్ణతేజ గెస్ట్‌హౌస్ వరకూ విస్తరించి ఉంది. క్యూ లైన్ లో భక్తులకు మంచినీరు, అన్న ప్రసాదాలను అందచేస్తున్నారు. ఉచిత దర్శనానికి భక్తులకు ఇరవై నాలుగు గంటల సమయం పడుతుందని తిరుమల తిరుపతి దేవస్థానం అధికారులు చెబుతున్నారు. అదే సమయంలో టైమ్ స్లాట్ టోకెన్లు కలిగి ఉన్న భక్తులకు దర్శనం ఆరు గంటలకు పైగా పడుతుంది. మూడు వందల రూపాయల ప్రత్యేక దర్శనం టిక్కెట్లు కొనుగోలు చేసిన భక్తులకు శ్రీవారి దర్శనం మూడు నుంచి నాలుగు గంటల సమయం పడుతుందని అధికారులు తెలిపారు. నిన్న తిరుమల శ్రీవారిని 76,200 మంది భక్తులు దర్శించుకున్నారు. వీరిలో 29,492 మంది భక్తులు తలనీలాలను సమర్పించుకుని మొక్కులు చెల్లించుకున్నారు. నిన్న తిరుమల శ్రీవారి హుండీ ఆదాయం 4.61 కోట్ల రూపాయల ఆదాయం వచ్చిందని అధికారులు వెల్లడించారు.