Tirumala : తిరుమలలో స్వామి వారిని నేడు దర్శించుకోవాలంటే?

బ్రహ్మోత్సవాలు జీవితంలో ఒక్కసారైనా చూడాలని ప్రతి బాలాజీ భక్తుడు పరితపించి పోతుంటారు. అందుకే బ్రహ్మోత్సవాలకు ఎక్కువ రద్దీ ఎప్పుడూ ఉండనే ఉంటుంది. ఈరోజు తిరుమలలోని వైకుంఠం క్యూ కాంప్లెక్స్‌లోని అన్ని కంపార్ట్‌మెంట్లన్నీ భక్తులతో నిండిపోయాయి. దీంతో బయట క్యూ లైన్ బాట గంగమ్మ దేవాలయం వరకూ విస్తరించి ఉంది. అతి పెద్ద లైన్ కావడంతో భక్తులు ఎక్కువ సంఖ్యలో వచ్చినట్లు చెప్పకనే తెలుస్తుంది. ఇక ఉచిత దర్శనానికి ఈరోజు ఇరవై నాలుగు గంటల సమయం పడుతుందని తిరుమల తిరుపతి దేవస్థానం అధికారులు తెలిపారు. అయినా వేగంగానే దర్శనం చేసి భక్తులను టీటీడీ సిబ్బంది పంపించి వేస్తున్నారు. ఇక వసతి గృహాలు దొరకడం దుర్లభంగా మారింది. కొన్ని గంటల పాటు వెయిట్ చేస్తేనే వసతి గృహం దొరికే పరిస్థితి ఉంది. నిన్న తిరుమల శ్రీవారిని 75,552 మంది భక్తులు దర్శించుకున్నారు. వీరిలో 35,885 మంది భక్తులు తమ తలనీలాలను సమర్పించుకుని మొక్కులు చెల్లించుకున్నారు. అయితే నిన్న హుండీ ఆదాయం మాత్రం చాలా తక్కువగా వచ్చింది. నిన్న తిరుమల శ్రీవారి హుండీ ఆదాయం 2.54 కోట్ల రూపాయలు మాత్రమే వచ్చిందని తిరుమల తిరుపతి దేవస్థానం అధికారులు తెలిపారు.