Tirumala : నేడు తిరుమలలో గరుడ వాహన సేవ... రష్ ఎలా ఉందంటే?

ఈరోజు మూడున్నర లక్షల మంది గరుడ సేవను చూసేందుకు తరలి వచ్చేందుకు తిరుమల తిరుపతి దేవస్థానం అధికారులు అన్ని ఏర్పాట్లు చేశారు. భక్తులు ఇబ్బంది పడకుండా మంచినీరు, అన్న ప్రసాదాలను సిద్ధం చేశారు. ఈరోజు తిరుమలలోని వైకుంఠం క్యూ కాంప్లెక్స్‌లోని అన్ని కంపార్ట్‌మెంట్లు భక్తులతో నిండిపోయాయి. బయట వకుళమాత రెస్ట్ హౌస్ వరకూ క్యూ లైన్ విస్తరించింది. ఉచిత దర్శనం క్యూ లైన్ లో ఉన్న భక్తులకు శ్రీవారి దర్శనం పద్దెనిమిది గంటల సమయం పడుతుందని అధికారులు తెలిపారు. బ్రేక్‌తో పాటు వీఐపీ దర్శనాలను కూడా టీటీడీ రద్దు చేయడంతో దర్శనం చేసుకోవాలంటే కష్టంగానే ఉంది. నిన్న తిరుమల శ్రీవారిని 81,481 మంది భక్తులు దర్శించుకున్నారు. వీరిలో 38,762 మంది భక్తులు తమ తలనీలాలను సమర్పించుకుని మొక్కులు చెల్లించుకున్నారు. నిన్న తిరుమల శ్రీవారి హుండీ ఆదాయం 3.31 కోట్ల రూపాయల ఆదాయం వచ్చిందని అధికారులు తెలిపారు. మాడ వీధుల్లో గరుడ వాహన సేవను తిలకించేందుకు ఇప్పటి నుంచే తమ స్థానాలను రిజర్వ్ చేసుకుంటున్నారు.