ఫ్యాక్ట్ చెక్: నుపుర్ శర్మకు మద్దతుగా అఘోరాలు రోడ్లపైకి వచ్చారా..?

ఫ్యాక్ట్ : వైరల్ అవుతున్న పోస్టుల్లో ఎటువంటి నిజం లేదు

సస్పెండ్ చేయబడిన భారతీయ జనతా పార్టీ (బీజేపీ) అధికార ప్రతినిధి నుపుర్ శర్మ ప్రవక్త పై చేసిన వ్యాఖ్యలు దేశ వ్యాప్తంగా వివాదానికి దారి తీసిన సంగతి తెలిసిందే..! ఈ వివాదం మధ్య, నాగ సాధువులు పెద్ద సంఖ్యలో వీధుల్లో ర్యాలీ చేస్తున్న వీడియోను సోషల్ మీడియాలో షేర్ చేస్తున్నారు. వీరంతా నుపుర్ శర్మకు తమ మద్దతును తెలియజేస్తూ ఉన్నారని చెబుతున్నారు.

ఓ టీవీ డిబేట్‌లో జ్ఞానవాపి మసీదు అంశంపై మాట్లాడుతున్న కమ్రంలో ముహమ్మద్‌ ప్రవక్త పై నుపుర్ శర్మ వ్యాఖ్యలు చేశారు. ఆ వ్యాఖ్యలను ముస్లిం సంఘాలతో పాటు 15 ఇస్లాం దేశాలు ఖండించాయి. గల్ఫ్‌ దేశాలు సైతం అక్కడున్న భారతీయ దౌత్యవేత్తలకు సమన్లు జారీ చేసి వివరణ, క్షమాపణలు కోరాయి. నుపుర్ శర్మను పార్టీ నుంచి సస్పెండ్‌ చేయడంతో పాటు ఆమె వ్యాఖ్యలను సైతం ఖండించింది బీజేపీ. తన వ్యాఖ్యలపై భేషరతు క్షమాపణలు చెప్పారు నుపుర్ శర్మ. పదే పదే మహాదేవుడ్ని(శివుడ్ని) అవమానించడం, అగౌరవపర్చడం వల్లే అలా మాట్లాడాల్సి వచ్చిందని వివరణ ఇచ్చారు.

ఆమెకు, ఆమె కుటుంబానికి ఎంతో మంది నుండి బెదిరింపులు వచ్చాయి. చంపేస్తామని కూడా వ్యాఖ్యలు చేశారు కొందరు. ఇలాంటి సమయంలో నాగా సాధువులు ఆమెకు మద్దతు తెలిపారంటూ పోస్టులు పెడుతూ వస్తున్నారు.