ప్రజ్ఞాన్‌ రోవర్‌ మేల్కొనకపోయినా పర్వాలేదు: ఇస్రో ఛైర్మన్‌
జాబిల్లిపై నిద్రాణ స్థితిలో ఉన్న ప్రజ్ఞాన్‌ రోవర్‌ తిరిగి మేల్కోకపోయినా ఎలాంటి సమస్యా ఉండదని ఇస్రో ఛైర్మన్‌..
జాబిల్లిపై నిద్రాణ స్థితిలో ఉన్న ప్రజ్ఞాన్‌ రోవర్‌ తిరిగి మేల్కోకపోయినా ఎలాంటి సమస్యా ఉండదని ఇస్రో ఛైర్మన్‌ ఎస్‌.సోమనాథ్‌ స్పష్టం చేశారు. చంద్రయాన్‌ 3 ప్రయోగంలో భాగంగా ప్రజ్ఞాన్‌ రోవర్‌ నుంచి తాము ఆశించిన పనిని రోవర్‌ ఇప్పటికే పూర్తి చేసిందని ఆయన పేర్కొన్నారు. ప్రస్తుతం తాము మరిన్ని ప్రయోగాలపై దృష్టి సారించామని అన్నారు. ఇటీవల గుజరాత్‌లోని గిర్‌ సోమ్‌నాథ్‌ జిల్లాలో ప్రఖ్యాత సోమ్‌నాథ్‌ ఆలయాన్ని ఇస్రో ఛైర్మన్‌ సందర్శించి ప్రత్యేక పూజలు నిర్వహించారు. అనంతరం ఆయన మీడియాతో మాట్లాడుతూ ఈ వ్యాఖ్యలు చేశారు.
రోవర్‌ నిద్రాణ స్థితిలోకి వెళ్లాక చంద్రుడిపై రాత్రివేళ ఉష్ణోగ్రతలు దాదాపు మైనస్‌ 200 డిగ్రీల సెల్సియస్‌ దాకా పడిపోయాయని తెలిపారు. అంతటి శీతల వాతావరణం వల్ల దానిలోని ఎలక్ట్రానిక్‌ సర్క్యూట్స్‌ దెబ్బతిని ఉండకపోతే ప్రజ్ఞాన్‌ మళ్లీ క్రియాశీలమవుతుందని చెప్పారు. ప్రస్తుతం ఇస్రో ఎక్స్‌రే పొలరీమీటర్‌ ఉపగ్రహ ప్రయోగానికి సన్నద్ధమవుతోందన్నారు.
కృష్ణబిలాలు, నెబ్యులాలు, పల్సర్లపై ప్రయోగాలు జరిపేందుకు.. పీఎస్‌ఎల్‌వీ రాకెట్‌ ద్వారా నవంబరు లేదా డిసెంబరులో దాన్ని నింగిలోకి పంపుతామని తెలిపారు. డిసెంబరులో ఇన్‌శాట్‌-3డీఎస్‌ వాతావరణ ఉపగ్రహాన్ని ప్రయోగిస్తామని వెల్లడించారు. నవంబరు లేదా డిసెంబరులో ఎస్‌ఎస్‌ఎల్‌వీ డీ3, వచ్చే ఏడాది ఫిబ్రవరిలో నిసార్‌ ప్రయోగాలు చేపడతామని వెల్లడించారు.