SLBC Accident : తవ్వకాలు జరపాలంటే అదే భయం..మరో ప్రమాదం జరగకుండా?

అయితే సొరంగ మార్గంలో అనేక ఆటంకాలు తవ్వకాలకు ఇబ్బందికరంగా మారాయి. టన్నెల్ లో మరో నాలుగు షీర్ జోన్లు ఉన్నట్లు అధికారులు చెబుతున్నారు. షీర్ జోన్లు అత్యంత ప్రమాదకరమని అంటున్నారు. మొత్తం టన్నెల్ లో పదకొండు వరకూ షీర్ జోన్లు ఉంటే.. అందులో ఆరు జోన్లు దాటి గాలింపు చర్యలు చేపట్టారు. ప్రమాదం జరిగిన చోట ఉన్న నాలుగు జోన్లు అత్యంత ప్రమాదకరమైనవని భావిస్తుండటంతో ఆచి తూచి అడుగులు వేస్తున్నారు. మరో ప్రమాదానికి తావివ్వకుండా ఆలోచించి, అందరూ సమిష్టిగా ఆలోచించిన తర్వాతనే నిర్ణయం తీసుకోనున్నారు.

షీర్ జోన్ల నుంచి నీరు ఉబికి వస్తుండటంతోనే ప్రమాదకరమని సహాయక బృందాలు చెబుతున్నాయి. ఏ మాత్రం తవ్వకాలు జరిపినా పై కప్పు కూలిపోయే అవకాశముందని భావించి అక్కడ జాగ్రత్తగా గాలింపు చర్యలు చేపట్టాల్సిన పరిస్థితి ఏర్పడింది. అందుకే మృతదేహాలను వెలికితీయడంలో ఆలస్యమవుతుంది. ఎన్ని ముందస్తు జాగ్రత్త చర్యలు తీసుకున్నా అజాగ్రత్తగా ఏ మాత్రం ఉన్నా మరో ప్రమాదం జరిగే అవకాశముందన్నహెచ్చరికలతో కొంత ఇబ్బందిగా మారుతుంది. పూర్తిగా అధ్యయనం చేసిన అనంతరం, ప్రమాదం లేని పరిస్థితుల్లోనే తవ్వకాలు జరపాలని నిర్ణయించినట్లు సమాచారం. దీంతో మరి కొంత కాలం మృతదేహాలు లభ్యమయ్యేందుకు సమయం పట్టే అవకాశముంది.