దేశంలోని వివిధ మార్గాల్లో కొత్త ఆరెంజ్‌, గ్రే కలర్స్‌లో వందే భారత్ ఎక్స్‌ప్రెస్‌ను నడపడానికి భారతీయ రైల్వే సన్నాహాలు చేస్తోంది. ఈ దిశలో ఒక అడుగు వేస్తూ, భారతీయ రైల్వే కొత్త వందే భారత్ ఎక్స్‌ప్రెస్ ట్రయల్ రన్‌ను విజయవంతంగా పూర్తి చేసింది. ఇంటెగ్రల్ కోచ్ ఫ్యాక్టరీ (ఐసిఎఫ్) తయారు చేసిన కొత్త రేక్‌ను చెన్నైలో మొదటి ట్రయల్ రన్‌కు ముందు రైల్వే మంత్రి అశ్విని వైష్ణవ్ పరిశీలించారు. ఈ వందే భారత్ ఎక్స్‌ప్రెస్‌లో కొత్త ఫీచర్లను జోడించారు. ఇందులో అనేక మార్పులు చేశారు. కొత్త వందే భారత్ ఎక్స్‌ప్రెస్‌లో చేసిన మార్పుల గురించి తెలుసుకుందాం.
మారిన ఫీచర్స్
➦ సీటు మునుపటి కంటే సౌకర్యవంతంగా, మెత్తగా ఉంటుంది.
➦ సీటు రిక్లైనింగ్ యాంగిల్ కూడా పెరిగింది.
➦ వాష్ బేసిన్ లోతు ఎక్కువగా ఉంటుంది.
➦ ఛార్జింగ్ పాయింట్ మునుపటి కంటే మెరుగ్గా ఉంటుంది.
➦ ఎగ్జిక్యూటివ్ క్లాస్‌లోని సీట్ల రంగు ఎరుపు నుండి బంగారు నీలం వరకు ఉంటుంది.
➦ మరుగుదొడ్లలో లైటింగ్‌ 1.5 నుంచి 2.5 వాట్లకు పెంచారు.
➦ కర్టెన్లు మునుపటి కంటే బలంగా, పారదర్శకంగా ఉంటాయి.
➦ కుళాయిలో నీటి ప్రవాహం కూడా మెరుగ్గా ఉంటుంది.
➦ టాయిలెట్ హ్యాండిల్స్ ఫ్లెక్సిబుల్‌గా ఉంటాయి.
➦ మెరుగైన AC కోసం గాలి బిగుతు మెరుగుపరచబడింది.
ప్రస్తుతం వందే భారత్ ఎక్స్‌ప్రెస్ భారతదేశంలో 25 రూట్లలో నడుస్తోంది. ఇది వివిధ రైల్వే జోన్లలోని అనేక రాజధాని నగరాలు, రాష్ట్రాలు, కేంద్రపాలిత ప్రాంతాలను కలుపుతుంది. ఢిల్లీ, ముంబై, చెన్నై, బెంగళూరు, భోపాల్, లక్నో, గాంధీనగర్, తిరుపతి, విశాఖపట్నం, మైసూరు, హౌరా, న్యూ జల్పైగురి, షిర్డీ, కోయంబత్తూర్, గౌహతి, డెహ్రాడూన్, జైపూర్, జోధ్‌పూర్, తిరువనంతపురం వంటి వందే భారత్ ఎక్స్‌ప్రెస్ అనుసంధానించబడిన ప్రధాన నగరాల్లో కొన్ని ఉన్నాయి. 15 ఫిబ్రవరి 2019న ప్రధాని నరేంద్ర మోదీ పచ్చజెండా ఊపి వందే భారత్ ఎక్స్‌ప్రెస్‌ను ప్రారంభించారు. మొదటి వందే భారత్ ఎక్స్‌ప్రెస్ న్యూఢిల్లీ, వారణాసి మధ్య నడుస్తుంది. ఇది "మేక్ ఇన్ ఇండియా" కింద చెన్నైలోని ఇంటిగ్రల్ కోచ్ ఫ్యాక్టరీ (ICF)లో తయారు చేశారు.
ఇంతలో, ఇంటిగ్రల్ కోచ్ ఫ్యాక్టరీ కూడా స్లీపర్ కోచ్‌లతో వందే భారత్ ఎక్స్‌ప్రెస్‌ను ప్రారంభించేందుకు సన్నాహాలు చేస్తోంది. రాత్రిపూట ప్రయాణంలో మార్పు తీసుకురావడమే ఈ కొత్త కోచ్‌ల లక్ష్యం. అలాగే, అనేక రైల్వే జోన్లలో రాజధాని ఎక్స్‌ప్రెస్ స్థానంలో రైళ్లు చివరికి వస్తాయనే అంచనాలు ఉన్నాయి. ఈ వందే భారత్ ఎక్స్‌ప్రెస్‌లో రైలు రంగులు మార్చడమే కాకుండా దాదాపు 25రకాల మార్పలు చేసినట్లు కేంద్ర మంత్రి తెలిపారు.