World Cup Finals 2023 : హిట్ మ్యాన్ ఫైనల్స్‌లోనూ సూపర్ హిట్ అవుతాడా? అంచనాలివే

అయితే ఇదిలా ఉంటే ఇప్పుడు టీం ఇండియాలో రోహిత్ శర్మ పైనే అంతా చర్చ జరుగుతుంది. కెప్టెన్ గా రోహిత్ శర్మ తీసుకునే నిర్ణయాలు.. ఆడిన తీరు..ను సీనియర్ క్రీడాకారులందరూ సమర్ధిస్తున్నారు. రోహిత్ శర్మ కెప్టెన్సీపై ప్రశంసల వర్షం కురిపిస్తున్నారు. టీంను వత్తిడిలోనూ విజయాలవైపు తీసుకొచ్చిన ఘనత రోహిత్ కే దక్కుతుందని చెప్పాలి. ఓటమి పాలయ్యే మ్యాచ్ నుంచి విక్టరీ వైపు నడిపించేలా రోహిత్ శర్మ కెప్టెన్ గా తీసుకున్న కీలక నిర్ణయాలు.. అందరి మన్ననలను పొందుతున్నాయి. రోహిత్ శర్మకు కూడా ఇదే ఆఖరి వరల్డ్ కప్ కావడంతో ఆయన అభిమానులంతా ఈ వరల్డ్ కప్ ను రోహిత్ చేత బూనాలని ఆకాంక్షిస్తున్నారు.

రోహిత్ శర్మ ఫామ్ లో ఉన్నాడు. ఆ విషయంలో ఎవరికీ డౌట్ లేదు. నిలబడ్డాడంటే.. ఉతికేస్తాడంతే. ఇప్పటి వరకూ ఈ వరల్డ్ కప్ లో ఎక్కువ పరుగులే చేశాడు. ఓపెనర్ గా దిగిన రోహిత్ శర్మ తొలి పవర్ ప్లేలోనే అత్యధిక పరుగులను సాధించి పెడుతుండటంతో తర్వాత వచ్చే వారిపై వత్తిడి సహజంగానే తగ్గుతుంది. ఓపెనర్ గా దిగిన రోహిత్ సిక్సర్లు, ఫోర్లు బాదుతూ ప్రత్యర్థితో మైండ్ గేమ్ ప్రారంభిస్తారు. బౌలర్లను వత్తిడికి గురి చేస్తున్నాడు. ఈ వరల్డ్ కప్ లో ఒకటి, రెండు మ్యాచ్ లు మినహా ఆయన దాదాపు అన్ని మ్యాచ్ లలోనూ సక్సెస్ ఫుల్ గానే ఆడాడు. స్కోరు బోర్డును తొలి పది ఓవర్లలోనే పరుగులు పెట్టించిన ఘనత రోహిత్ శర్మదే.

అలాగే రోహిత్ శర్మ ఎప్పుడూ రికార్డుల కోసం పాకులాడడు. ఆ గేమ్ విజయం పైనే దృష్టి పెడతాడు. ఎన్ని సార్లు హాఫ్ సెంచరీలు మిస్ చేసుకున్నాడో ఈ వరల్డ్ కప్ లోనే అందరం చూశాం. బంతి పైకి లేపి దొరికిపోతున్నాడు తప్పించి హాఫ్ సెంచరీకి జిడ్డు ఆట ఆడితే హాఫ్ సెంచరీలు ఆయన ఖాతాల్లో ఖచ్చితంగా జమఅయ్యేవి. అందుకే రోహిత్ శర్మను మొదటి రెండు, మూడు ఓవర్లలోనే అవుట్ చేయాలని ప్రత్యర్థి జట్టు ప్రయత్నిస్తుంది. అత్యధిక సిక్సర్లు కూడా ఈ వరల్డ్ కప్ లో బాదింది రోహిత్ మాత్రమే. అందుకే ఇన్ని విజయాలను మనకు మూట కట్టి మరీ అందించాడు. ఫైనల్స్ లోనూ హిట్ మ్యాన్ ఆ దూకుడు కొనసాగితే ఇక విజయం మనదే. కప్పు కూడా మనదే. హండ్రెడ్ పర్సెంట్ గ్యారంటీ.