Tirumala : తిరుమల వెళ్లే భక్తులకు గుడ్ న్యూస్.. నేరుగా దర్శనం

తిరుమలలో గత కొద్ది రోజులుగా భక్తుల రద్దీ తగ్గడానికి కారణాలు అనేకం ఉన్నప్పటికీ అధికారులు మాత్రం వచ్చిన భక్తులు ఇబ్బంది పడకుండా అన్ని చర్యలు తీసుకుంటున్నారు. నేడు తిరుమలలోని వైకుంఠం క్యూ కాంప్లెక్స్ లోని అన్ని కంపార్ట్‌మెంట్లు ఖాళీగానే ఉన్నాయి. నేరుగా స్వామి వారిని దర్శించుకునే వీలుందని తిరుమల తిరుపతి దేవస్థానం అధికారులు తెలిపారు. ఉచిత దర్శనం క్యూ లైన్ లోకి ఈరోజు ఉదయం ఏడు గంటలకు టోకెన్లు లేకుండా ప్రవేశించే భక్తులకు శ్రీవారి దర్శనం ఆరు గంటల సమయం పడుతుందని అధికారులు తెలిపారు. టైమ్ స్లాట్ దర్శనం భక్తులకు రెండు గంటల్లో దర్శనం పూర్తవుతుంది. మూడు వందల రూపాయల ప్రత్యేక దర్శనం టిక్కెట్లు కొనుగోలు చేసిన భక్తులకు శ్రీవారి దర్శనం రెండు గంటల్లోనే పూర్తవుతుంది. నిన్న తిరుమల శ్రీవారిని 69,333 మంది భక్తులు దర్శించుకున్నారు. వీరిలో 22,606 మంది తమ తలనీలాలను సమర్పించి మొక్కులు చెల్లించుకున్నారు. నిన్న తిరుమల శ్రీవారి హుండీ ఆదాయం 3.53 కోట్లు వచ్చిందని అధికారులు వెల్లడించారు. మరో మూడు రోజులు పాటు ఇదే పరిస్థితి కొనసాగుతుందని అధికారులు చెబుతున్నారు.