Tirumala : తిరుమలలో స్వల్పంగానే రద్దీ... తక్కువ సమయంలోనే దర్శనం

గత మూడు రోజుల నుంచి తిరుమలలో పెద్దగా రద్దీ లేదు. భారీ వర్షాలంటూ వాతావరణ శాఖ చేసిన హెచ్చరికతో భక్తుల రద్దీ తగ్గిందని అధికారులు చెబుతున్నారు. ఈరోజు తిరుమలలోని వైకుంఠం క్యూ కాంప్లెక్స్‌లోని ఆరు కంపార్ట్‌మెంట్లలోనే భక్తులు స్వామి వారి దర్శనానికి వేచి ఉన్నారు. ఉచిత దర్శనం క్యూ లైన్ లో ఈరోజు ఉదయం ఏడు గంటలకు టోకెన్లు లేకుండా ప్రవేశించే భక్తులకు స్వామి వారి దర్శనం ఆరు గంటల సమయం పడుతుందని తిరుమల తిరుపతి దేవస్థానం అధికారులు చెబుతున్నారు. టైమ్ స్లాట్ టోకెన్లున్న భక్తులకు రెండు గంటల్లో దర్శనం పూర్తవుతుంది. అలాగే మూడు వందల రూపాయల ప్రత్యేక దర్శనం టిక్కెట్లను కొనుగోలు చేసిన భక్తులకు శ్రీవారి దర్శనం గంట నుంచి రెండు గంటల్లో పూర్తవుతుంది. నిన్న తిరుమల శ్రీవారిని 77,939 మంది భక్తులు దర్శించుకున్నారు. వీరిలో 22,668 మంది భక్తులు తమ తలనీలాలను సమర్పించి మొక్కులు చెల్లించుకున్నారు. నిన్న తిరుమల శ్రీవారి హుండీ ఆదాయం 3.50 కోట్ల రూపాయల ఆదాయం వచ్చిందని అధికారులు వెల్లడించారు.