ఎన్టీఆర్ వీరాభిమాని శ్యామ్ హఠాన్మరణం.. సంచలనం రేపింది. అతను నిజంగానే సూసైడ్ చేసుకున్న పరిస్థితుల్లో కనిపించి ఉంటే ఇన్ని అనుమానాలు ఉండేవి కావేమో. కానీ.. శ్యామ్ విగతజీవిగా కనిపించిన తీరు, పోలీసుల వ్యవహార శైలి, శ్యామ్ ను చూసేందుకు తల్లిదండ్రుల్ని తప్ప ఎవరినీ అనుమతించకపోవడం.. ఇవన్నీ ఎన్టీఆర్ అభిమానుల అనుమానాలకు ఆద్యం పోశాయి. రెండు రోజులుగా సోషల్ మీడియాలో శ్యామ్ మృతిపైనే తీవ్రమైన చర్చ జరుగుతోంది. నిజంగా సూసైడ్ చేసుకుంటే.. మెడపై ఉరితాడు ఆనవాళ్లు లేవని కొందరు, కాళ్లు నేలకు ఆనేలా ఎవరు ఉరి వేసుకుంటారు అని ఇంకొందరు.. చేతిని అంత డీప్ గా కట్ చేసుకున్నాక కూడా ఉరి ఎలా వేసుకుంటాడు ? అన్న ప్రశ్నలు లేవనెత్తారు ఎన్టీఆర్ అభిమానులు. పైగా కావాలని అతని జేబులో గంజాయి ప్యాకెట్ పెట్టి.. ఆ మత్తులో ఉద్యోగం లేదన్న బాధతో ఆత్మహత్య చేసుకున్నాడని క్రియేట్ చేశారని ఎన్టీఆర్ అభిమానులు ముక్తకంఠంతో వాదిస్తున్నారు.
తొలుత శ్యామ్ ది అనుమానాస్పద మృతి అని చెప్పగా.. ఆ తర్వాత అతనిది ఆత్మహత్య అని, సెల్ఫీ వీడియో కూడా ఉందని పోలీసులు తెలిపారు. అయితే ఆ వీడియో కావాలని చెప్పించి తీయించిన వీడియో అన్నది ఎన్టీఆర్ అభిమానుల వాదన. తాజాగా.. ఈ కేసులో మరో ట్విస్ట్ చోటుచేసుకుంది. ఓ యూజర్ ఫేక్ ఐడీ నుంచి శ్యామ్ ఒక యువతితో కలిసి ఉన్న ఫొటోలను షేర్ చేశాడు. ఈ ఫొటోలతో ఎన్టీఆర్ అభిమానుల అనుమానాలు, శ్యామ్ కుటుంబ సభ్యుల అనుమానాలు మరింత ఎక్కువయ్యాయి. పైగా.. శ్యామ్ ఇన్ స్టా స్టోరీలో కూడా "నాకు నువ్వు కావాలి" అంటూ ఆ అమ్మాయి గురించి స్టేటస్ పెట్టిన స్క్రీన్ షాట్లు బయటికొచ్చాయి.
తిరుపతి నుంచి చింతలూరు గ్రామానికి ఓ యువతి కోసం వెళ్లిన శ్యామ్.. మరుసటిరోజు ఉదయానికి తిరిగి వెళ్లిపోవాల్సి ఉంది. ఇంతలోనే అతనికి జాబ్ లేదని గుర్తొచ్చి.. ఆ అమ్మాయి వాళ్ల ఊరిలోనే ఆత్మహత్య చేసుకోవడం.. ఏమైనా నమ్మేలా ఉందా ? అని కొత్త సందేహం తెరపైకి వచ్చింది. ఫొటోలు పోస్ట్ చేసిన ఫేక్ ఐడీ సజ్జల భార్గవ రెడ్డి పేరుతో క్రియేట్ చేయడంతో.. ఇన్ డైరెక్ట్ గా ఈ కేసులో అతను ఇన్వాల్వ్ అయి ఉన్నాడని అంటున్నారు. #WeWantJusticeForShyamNTR ట్యాగ్ తో.. శ్యామ్ ను చంపిన వాళ్లను ఊరికే వదలొద్దంటూ ట్వీట్లు చేస్తున్నారు.
తన కొడుకుది ఆత్మహత్య కాదని, చంపేసి ఆత్మహత్యగా చిత్రీకరించారని శ్యామ్ తండ్రి తెలిపారు. ఉదయానికల్లా వచ్చేస్తానని జూన్ 24 రాత్రి చెప్పాడని, ఇంతలోనే ఉదయం అర్జంటుగా వెళ్లాలి రండి అంటూ తమ బంధువులు వచ్చి తీసుకెళ్లారని మీడియాకు తెలిపారు. అప్పటికే శ్యామ్ స్నేహితులు తీసిన ఫొటోల్లో వీపుపై గాయం, కాలు బెండు తీసిన ఆనవాళ్లు కనిపించాయన్నారు. ఆత్మహత్య చేసుకున్నవాడి శరీరంపై ఇలాంటివన్నీ ఎలా కనిపిస్తాయన్న సందేహాలు తమకు ఉన్నాయన్నారు. తిరుపతి జిల్లా మొత్తం ఎన్టీఆర్ ఫ్యాన్స్ తమకు అండగా ఉంటామని చెప్పారని, శ్యామ్ ది హత్యేనని తమకు అనుమానం ఉందన్నారు. దానిపై పోలీసులు దర్యాప్తు చేసి, కారకులను కఠినంగా శిక్షించాలని కోరామన్నారు.
హోటల్ మేనేజ్ మెంట్ ఇష్టపడి చదివిన తన అన్నయ్యకు ఇలా ఉద్యోగం లేదన్న బాధతో ఆత్మహత్య చేసుకోవాల్సిన అవసరం లేదని శ్యామ్ చెల్లెలు పేర్కొంది. తన తల్లిదండ్రులు కూడా ఏ రోజూ ఆ విషయం గురించే ప్రశ్నించలేదని, దీని వెనుక ఇంకేదో కారణం ఉందని అనుమానం వ్యక్తం చేసింది. వైరల్ అవుతున్న ఆ ఫొటోల్లో ఉన్న యువతి ఎవరు ? ఆమె గురించి శ్యామ్ ఎందుకు స్టేటస్ పెట్టాడు ? ప్రేమ కారణంగా శ్యామ్ ను పరువు హత్య చేసి ఆత్మహత్యగా చిత్రీకరించారా ? పోలీసులు ఎందుకు ఈ విషయాలపై స్పందించడం లేదు ? సజ్జల భార్గవరెడ్డికి ఈ కేసుకి సంబంధం ఏంటి ? ఇప్పుడు అందరి తలలో మెదులుతున్న ప్రశ్నలివి. మరి పోలీసులు శ్యామ్ తండ్రి ఫిర్యాదుపై స్పందించి దర్యాప్తు చేస్తారా ? లేక శ్యామ్ ది ఆత్మహత్యేనని కేసును క్లోజ్ చేస్తారా ? చూడాలి.