Tirumala : శ్రీవారి భక్తులకు గుడ్ న్యూస్.. నేడు సులువుగా దర్శనం
తిరుమలలో నేడు భక్తుల రద్దీ తక్కువగా ఉంది. సోమవారం కావడంతో భక్తులు పెద్దగా లేరు
తిరుమలలో నేడు భక్తుల రద్దీ తక్కువగా ఉంది. సోమవారం కావడంతో భక్తులు పెద్దగా తిరుమలకు చేరుకోకపోవడంతో శ్రీవారి దర్శనం సులువుగా భక్తులకు లభిస్తుంది. కార్తీక సోమవారం కావడంతో ఎక్కువ మంది భక్తులు శైవక్షేత్రాలకు వెళ్లేందుకు ఎక్కువ సుముఖత చూపుతారు. అందుకే తిరుమలలో భక్తుల రద్దీ అంతగా లేదు. కార్తీక మాసంలోనూ శుక్ర, శని, ఆదివారాలు ఎక్కువ మంది భక్తులు తిరుమలకు వస్తారు. ఈరోజు ఆన్ లైన్ లో భక్తులకు శ్రీవారి టిక్కెట్లను తిరుమల తిరుపతి దేవస్థానం అధికారులు విడుదల చేయనున్నారు. ఫిబ్రవరి నెలకు సంబంధించిన ప్రత్యేక దర్శనం టిక్కెట్లను నేడు ఆన్ లైన్ లో పొందే అవకాశాన్ని టీటీడీ భక్తులకు కల్పించింది.
మూడు కంపార్ట్ మెంట్లలోనే...
అలాగే ఫిబ్రవరి నెలకు సంబంధించి దర్శన టిక్కెట్లతో పాటు వసతి గృహాలను కూడా ఆన్ లైన్ లో ముందుగా బుక్ చేసుకునే వీలుంది. దీంతో ఆన్ లైన్ లో ఓపెన్ అయిన వెంటనే టిక్కెట్లు హాట్ కేకుల్లా అమ్ముడు పోనున్నాయి. ఈరోజు తిరుమలలోని వైకుంఠం క్యూ కాంప్లెక్స్ లోని మూడు కంపార్ట్ మెంట్లలోనే భక్తులు శ్రీవారి దర్శనం కోసం వేచి ఉన్నారు. ఉచిత దర్శనం క్యూ లైన్ లో ఉదయం ఏడు గంటలకు టోకెన్లు లేకుండా ప్రవేశించిన భక్తులకు శ్రీవారి దర్శనం ఎనిమిది గంటల సమయం పడుతుందని తిరుమల తిరుపతి దేవస్థానం అధికారులు తెలిపారు.
హుండీ ఆదాయం...
టైమ్ స్లాట్ దర్శనం భక్తులకు కేవలం రెండు గంటల్లోనే దర్శనం అవుతుంది. మూడు వందల రూపాయల ప్రత్యేక దర్శనం టిక్కెట్లను కొనుగోలు చేసిన భక్తులకు నేడు శ్రీవారి దర్శనం రెండు నుంచి మూడు గంటల దర్శన సమయం పడుతుందని తిరుమల తిరుపతి దేవస్థానం అధికారులు తెలిపారు. నిన్న తిరుమల శ్రీవారిని 71,441 మంది భక్తులు తిరుమల శ్రీవారిని దర్శించుకున్నారు. వీరిలో 23,595 మంది భక్తులు తమ తలనీలాలను సమర్పించి మొక్కులు చెల్లించుకున్నారని అధికారులు తెలిపారు. నిన్న తిరుమల శ్రీవారి హుండీ ఆదాయం 3.87 కోట్ల రూపాయలు వచ్చిందని అధికారులు వెల్లడించారు.