Tirumala : తిరుమలలో ఏ మాత్రం తగ్గని రద్దీ .. నేడు భక్తుల రద్దీ ఎలా ఉందంటే?

తిరుమల సాధారణంగా ఎప్పుడూ రద్దీగానే ఉంటుంది. శ్రీ వెంకటేశ్వరస్వామిని దర్శించుకోవడం మొక్కులు చెల్లించుకోవడమే కాకుండా, తిరుమల కొండపై ఒకరోజు నిద్రిస్తే పుణ్యం లభిస్తుందని భావించడంతో రద్దీ ఎప్పటికప్పుడు పెరుగుతూనే ఉంటుంది. గతంలో వేసవి కాలంలో నే ఎక్కువ రద్దీ ఉండేది. కానీ ఇప్పుడు సీజన్ తో సంబంధం లేకుండా రద్దీ ఏర్పడుతుంది. ఈరోజు తిరుమలలోని వైకుంఠం క్యూ కాంప్లెక్స్ లోని పదహారు కంపార్ట్ మెంట్లలో భక్తుల శ్రీవారి దర్శనం కోసం వేచి చూస్తున్నారు. ఉచిత దర్శనం క్యూ లైన్ లోకి ఉదయం ఏడు గంటలకు టోకెన్లు లేకుండా ప్రవేశించిన భక్తులకు శ్రీవారి దర్శనం పదిహేను గంటల సమయం పడుతుందని తిరుమల తిరుపతి దేవస్థానం అధికారులు తెలిపారు. టైమ్ స్లాట్ దర్శనం భక్తులకు రెండు నుంచి మూడు గంటల సమయం పడుతుంది. మూడు వందల రూపాయల ప్రత్యేక దర్శనం టిక్కెట్లను కొనుగోలుచేసిన భక్తులకు శ్రీవారి దర్శనం మూడు నుంచి నాలుగు గంటల సమయం పడుతుందని అధికారులు తెలిపారు. నిన్న తిరుమల శ్రీవారిని 70,457 మంది దర్శించుకున్నారు. వీరిలో 22,152 మంది భక్తులు తమ తలనీలాలను సమర్పించి మొక్కులు చెల్లించుకున్నారు. నిన్న తిరుమల శ్రీవారి హుండీ ఆదాయం 4.16 కోట్ల రూపాయలు ఆదాయం వచ్చిందని అధికారులు వెల్లడించారు.