దసరాకు ఆ సరదాయే వేరు

ప్రభుత్వం కూడా పాఠశాలలకు, కళాశాలలకు ఎక్కువ రోజులు సెలవులు ప్రకటించే పండగ ఇది. ప్రతి ఒక్కరూ దసరా పండగకు తమ గ్రామానికి చేరుకుని జరుపుకోవడం ఆనవాయితీగా వస్తుంది. కుటుంబ సభ్యులందరూ కలసి చేసుకునే పండగగా దీనిని భావిస్తారు. తొమ్మిది రోజులు అమ్మవారిని అత్యంత భక్తి శ్రద్ధలతో పూజించి తమకు ఆరోగ్య, ఐశ్వర్యాలను ప్రసాదించాలని వేడుకుంటారు. వరసగా రోజుకో అవతారంతో అమ్మవారిని పూజించడం మన సంస్కృతిలో భాగంగా మారింది.

దసరా నవరాత్రుల సమయంలో అత్యంత భక్తి శ్రద్ధలతో అమ్మవారిని పూజిస్తారు. ప్రతి వీధిలో దుర్గమ్మ విగ్రహాలను ఏర్పాటు చేసుకుని పూజలు నిర్వహిస్తారు. వినాయకుడి తరహాలోనే వీధి వీధినా దుర్గమ్మ విగ్రహాలను ఏర్పాటు చేసుకుని నవరాత్రులను జరుపుకోవడం ఆనవాయితీగా వస్తుంది. అన్ని దుర్గామాత ఆలయాల్లోనూ నవరాత్రులు జరుపుతారు. రోజుకొక అలంకారంతో అమ్మవారిని పూజిస్తూ తమ కుటుంబాన్ని కాపాడమంటూ వేడుకుంటారు. ఈ తొమ్మిదిరోజులు ఉపవాసాలు ఉండి అత్యంత భక్తి శ్రద్థలతో ఈ పండగను జరపుకుంటుంటారు.

అటువంటి దసరా పండగను చూడాలంటే తెలంగాణలోనే చూడాలి. ఈ ప్రాంతంలోనే అత్యధికంగా ఇష్టపడి జరుపుకునే పండగ కావడంతో రాష్ట్ర ప్రభుత్వం కూడా ప్రత్యేకంగా ఈ పండగ కోసం ఏర్పాట్లు చేస్తుంది. ఆర్టీసీ గ్రామీణ ప్రాంతాలకు ప్రత్యేక సర్వీసులను నడుపుతుంది. పెద్ద పండగ కావడంతో బంగారం, వస్త్ర దుకాణాలు కొనుగోలుదారులతో కిటకిటలాడుతుంటాయి. చిన్న స్థాయి నుంచి పెద్ద స్థాయి వరకూ అతి పెద్ద వేడుకగా దసరాను నిర్వహించుకుంటారు.