1983 వరల్డ్ కప్ విజయానికి 40 ఏళ్ళు

1983 వరల్డ్ కప్ ఫైనల్లో అండర్ డాగ్‌గా బరిలో దిగిన భారత జట్టు.. ఎవరూ ఊహించని విధంగా ఫైనల్ చేరింది. భయంకరమైన విండీస్‌తో తలపడేందుకు పసికూనగా పేరు ఉన్న భారత్ సిద్ధమైంది. ఈ మ్యాచ్‌లో భారత బ్యాటింగ్ పెద్దగా రాణించలేదు. తొలుత బ్యాటింగ్ చేసిన భారత జట్టులో ఓపెనర్ క్రిస్ శ్రీకాంత్ (38), మొహిందర్ అమర్‌నాథ్ (26), సందీప్ పాటిల్ (27) మాత్రమే రాణించారు. నిర్ణీత 60 ఓవర్లలో భారత జట్టు కేవలం 183 పరుగులు మాత్రమే చేయగలిగింది. ఈ స్కోరు చూసిన వాళ్లంతా విండీస్ విజయం ఖాయమని అనుకున్నారు. భారత బౌలర్లు నౌ ఆర్ నెవర్ అనే రీతిలో విజృంభించడంతో షాక్ అవ్వడం విండీస్ బ్యాట్స్మెన్.. కాదు కాదు.. క్రికెట్ ప్రపంచం వంతు అయింది. మొహిందర్ అమర్‌నాథ్ కేవలం 12 పరుగులే ఇచ్చి మూడు కీలక వికెట్లు పడగొట్టాడు. మదన్ లాల్ కూడా 31 పరుగులిచ్చి 3 వికెట్లు తీసుకున్నాడు. లెజెండరీ బ్యాటర్ వివ్ రిచర్డ్స్ (33), జెఫ్ డూయోన్ (25) తప్ప ఎవరూ భారత బౌలింగ్ లైనప్ ముందు నిలబడలేకపోయారు. బల్వీందర్ సంధూ రెండు వికెట్లు, రోజర్ బిన్నీ, కపిల్ దేవ్ చెరో వికెట్ తీసుకున్నారు. దీంతో వెస్టిండీస్ కేవలం 140 పరుగులకే ఆలౌట్ అయింది. భారత జట్టు 43 పరుగుల తేడాతో విజయం సాధించింది. క్రికెట్‌లో భారత్ అందుకున్న తొలి వరల్డ్ కప్ కావడంతో భారత్ లో సెలెబ్రేషన్స్ తారా స్థాయికి చేరుకున్నాయి. ఈ టోర్నమెంట్ తర్వాత భారత్ లో క్రికెట్ మరో స్థాయికి వెళ్ళింది.