చరిత్ర సృష్టించిన తెలుగు యువ షట్లర్ సాత్విక్
ప్రతిష్ఠాత్మక ఆసియా బ్యాడ్మింటన్ చాంపియన్‌షిప్స్‌ టోర్నమెంట్ లో పురుషుల డబుల్స్‌లో ఫైనల్ చేరిన భారత తొలి జంటగా..
asia badminton championship 2023
ఆంధ్రప్రదేశ్ యువ బ్యాడ్మింటన్ క్రీడాకారుడు రంకిరెడ్డి సాత్విక్ సాయిరాజ్ తన భాగస్వామి చిరాగ్ శెట్టితో కలిసి సరికొత్త చరిత్ర సృష్టించారు. ప్రతిష్ఠాత్మక ఆసియా బ్యాడ్మింటన్ చాంపియన్‌షిప్స్‌ టోర్నమెంట్ లో పురుషుల డబుల్స్‌లో ఫైనల్ చేరిన భారత తొలి జంటగా వీరిద్దరూ రికార్డుకెక్కారు. ఈ టోర్నీలో అద్భుత ప్రదర్శన కొసాగించిన సాత్విక్, చిరాగ్ కనీసం రజత పతకం ఖాయం చేసుకున్నారు. పురుషుల డబుల్స్ సెమీ ఫైనల్లో ఆరో సీడ్‌ సాత్విక్–చిరాగ్ 21–18, 13–14తో నిలిచిన దశలో వారి ప్రత్యర్థి, లీ యాంగ్‌–వాంగ్ చిన్ లిన్‌ (చైనీస్‌ తైపీ) రిటైర్డ్ హర్ట్ గా వెనుదిరగక తప్పలేదు.
వాంగ్ చిన్ కు గాయంకావడంతో.. వాకోవర్ లభించిన సాత్విక్, చిరాగ్ నేరుగా ఫైనల్ చేరుకున్నారు. నేడు (ఏప్రిల్ 30) రాత్రి జరిగే ఫైనల్లో ఎనిమిదో సీడ్‌ సిన్‌ యెవ్‌–యి యె (మలేసియా) జంటతో సాత్విక్–చిరాగ్ అమీతుమీ తేల్చుకోనున్నారు. 52 ఏళ్ల క్రితం ఇదే టోర్నీలో పురుషుల డబుల్స్ లో కాంస్యపతకం లభించింది. ఇప్పుడు సాత్విక్ - చిరాగ్ లు ఫైనల్ లో ఓడినా.. రజతం సాధించిన భారత ఆటగాళ్లుగా చరిత్రలో నిలుస్తారు.