IPL 2024 Auction : కోట్లు కుమ్మరించడానికి రెడీ.. ఆల్ రౌండర్లకే ప్రయారిటీ

ఐపీఎల్ అంటే అందరికీ ఇష్టం. 20 ఓవర్ల ఆట కావడం... అందరు ప్లేయర్లను ఒక జట్టులో చూడటం.. సొగసైన షాట్లు... అబ్బురపర్చే క్యాచ్‌లు... అద్భుతమైన రన్ అవుట్లు.... ఆకాశం అంచున తాకే సిక్సర్లు.. బౌండరీలకు పరుగులు తీసే బంతులు... బాల్ వెళ్లి వికెట్ ను తీసుకెళ్లడం ఇలా ఒక్కటేమిటి... ప్రతి ఒక్క కదలిక.. కళ్లకు కట్టిపడేస్తాయి. స్టేడియానికి వెళ్లకపోయినా ఇంట్లో కూర్చుని మ్యాచ్ ను ఆస్వాదించే కోట్లాది అభిమానుల మనస్సులను కొల్లగొట్టే ఐపీఎల్ కోసం అంతా సిద్ధం చేస్తున్నారు.

ఈ నెల 19వ తేదీన జరగబోయే ఆటగాళ్ల వేలానికి అంతా రెడీ చేవారు. ఫ్రాంచైజీలకు ఆటగాళ్ల జాబితాను అందించారు. మొత్తం 333 మంది ప్లేయర్లలో 214 మంది ఇండియన్స్. 119 మంది ఇతర దేశాలకు చెందిన ఆటగాళ్లు. వేలంలో ఫ్రాంచైజీల వద్ద ఉన్న సొమ్ము మొత్తం 262.95 కోట్ల రూపాయలు. గరిష్టంగా 30 మంది విదేశీ ఆటగాళ్లను ఫ్రాంచైజీలను కొనుగోలు చేసే అవకాశముంది. కోట్లు ధరలు పలికే ఆటగాళ్లను కొనుగోలు చేయడమే కాకుండా ఆల్ రౌండర్లకే ఎక్కువ ప్రాధాన్యత ఇవ్వనున్నారు. ఆల్ రౌండర్లు ఉంటేనే ఐపీఎల్ కప్పు దొరకబుచ్చుకోవడం సాధ్యమవుతుందన్న అంచనాతో ఎక్కువ సొమ్ము వెచ్చించైనా ఆల్ రౌండర్ ను కొనుగోలు చేసేందుకు ఫ్రాంచైజీస్ పోటీ పడతాయి. చూద్దాం... ఈసారి ఎవరు అత్యంత ధర పలుకుతారో... మరో వారం వెయిట్ చేస్తే చాలు.. తెలిసిపోతుంది.