తెలంగాణకు రెయిన్ అలర్ట్

తెలంగాణలో నేడు, రేపు తేలికపాటి నుంచి ఓ మోస్తరు వర్షాలు కురిసే అవకాశం ఉందని వాతావరణ శాఖ తెలిపింది. పశ్చిమ భారత ప్రాంతాల నుంచి రాష్ట్రంలోకి తక్కువ ఎత్తులో గాలులు వీస్తుండడంతో ఆదివారం తెలంగాణలోని పలు ప్రాంతాల్లో వర్షాలు కురిసే అవకాశం ఉంది. శనివారం హైదరాబాద్ సహా తెలంగాణ రాష్ట్రంలోని పలు ప్రాంతాల్లో వర్షం కురిసింది. 13వ తేదీ వరకు రాష్ట్రంలో విస్తరంగా వానలు కురుస్తాయని వాతావరణ శాఖ స్పష్టం చేసింది. 12,13వ తేదీలలో పలు జిల్లాలకు ఎల్లో అలర్ట్ కూడా జారీ చేసింది. నైరుతి రుతుపవనాలు తెలంగాణవ్యాప్తంగా విస్తరించడంతో రాష్ట్రవ్యాప్తంగా వర్షాలు పడుతున్నాయి. గత నెల కంటే ఈ నెలలో వర్షపాతం ఎక్కువగా నమోదవుతుందని తెలిపారు. హైదరాబాద్‌లో ఆకాశం మేఘావృతమై ఉండనుండగా.. సాయంత్రం లేదా రాత్రి సమయాల్లో చిరు జల్లులు పడతాయని వాతావరణశాఖ తెలిపింది. గరిష్ట ఉష్ణోగ్రతలు 32 డిగ్రీలలోపు నమోదయ్యే అవకాశముందని అంచనా వేసింది.