Tirumala : కిటకిటలాడుతున్న తిరుమల కొండలు.. గోవింద నామస్మరణతో

తిరుమల భక్తజన సంద్రంగా మారింది. మాడ వీధులన్నీ భక్తులతో నిండిపోయాయి. ఎక్కడ చూసినా భక్తుల రద్దీ కనిపిస్తుంది. ఈరోజు తిరుమల వైకుంఠం క్యూ కాంప్లెక్స్‌లోని అన్ని కంపార్ట్‌మెంట్లూ భక్తులతో నిండిపోయాయి. టీబీసీ గెస్ట్ హౌస్ వరకూ క్యూ లైన్ లో భక్తులు ఉన్నారు. ఉచిత దర్శనం క్యూ లైన్ లో టోకెన్లు లేకుండా ఈ ఉదయం ప్రవేశించిన భక్తులకు శ్రీవారి దర్శనం 18 గంటల సమయం పడుతుందని తిరుమల తిరుపతి దేవస్థానం అధికారులు తెలిపారు. టైమ్ స్లాట్ దర్శనానికి భక్తులకు ఆరు గంటలకు పైగానే సమయం పడుతుంది. మూడు వందల రూపాయల ప్రత్యేక దర్శనం టిక్కెట్లు కొనుగోలు చేసిన భక్తులకు శ్రీవారి దర్శనం నాలుగు నుంచి ఐదు గంటల సమయం పడుతుంది. నిన్న తిరుమల శ్రీవారిని 66,986 మంది భక్తులు దర్శించుకున్నారు. వీరిలో 26,163 మంది భక్తులు తమ తలనీలాలను సమర్పించి మొక్కులు చెల్లించుకున్నారు. నిన్న తిరుమల శ్రీవారి హుండీ ఆదాయం రికార్డు స్థాయికి చేరుకుంది. ఇటీవల కాలంలో ఇంత స్థాయిలో హుండీ ఆదాయం రాలేదు. నిన్న హుండీ ఆదాయం 5.05 కోట్ల రూపాయలు వచ్చిందని అధికారులు వెల్లడించారు.