Tirumala : తిరుమలలో భక్తుల రద్దీతో అలెర్టయిన అధికారులు

తిరుమలలో ఈ నె 5న నాగులచవితి సందర్భంగా శ్రీవారికి పెద్దశేష వాహనసేవ జరుగుతుందని అధికారులు తెలిపారు. 8న పుష్పయాగానికి అంకురార్పణ జరుగుతుందని, 9న మలయప్పస్వామికి పుష్పార్చన ఉంటుందని, ఈనెల 13న సూర్యోదయానికి ముందు శ్రీదేవి భూదేవి సమేతుడైన ఉగ్రశ్రీనివాసమూర్తి తిరుమాడ వీధుల్లో ఊరేగనున్నారని అధికారులు తెలిపారు. ఈనెల 15వ తేదీన కార్తీక పౌర్ణమి సందర్భంగా గరుడు వాహనంపై శ్రీవారి దర్శనం ఉంటుందని తిరుమల తిరుపతి దేవస్థానం అధికారులు తెలిపారు. ఈరోజు తిరుమలలోని వైకుంఠం క్యూ కాంప్లెక్స్ లోని అన్ని కంపార్ట్ మెంట్లలో భక్తులు వేచి ఉన్నారు. క్యూ లైన్ బయట వరకూ విస్తరించి ఉంది. ఈరోజు ఉచిత దర్శనం క్యూ లైన్ లో ఉన్న భక్తులకు శ్రీవారి దర్శనం పద్దెనిమిది గంటల సమయం పడుతుందని అధికారులు తెలిపారు. టైమ్ స్లాట్ దర్శనానికి ఐదు గంటల సమయం పడుతుంది. మూడు వందల రూపాయల ప్రత్యేక దర్శనం టిక్కెట్లు కొనుగోలు చేసిన భక్తులకు శ్రీవారి దర్శనం మూడు నుంచి నాలుగు గంటల సమయం పడుతుందని అధికారులు తెలిపారు. నిన్న తిరుమల శ్రీవారిని 80,706 మంది భక్తులు దర్శించుకున్నారు. వీరిలో 36,829 మంది భక్తులు తమ తలనీలాలను సమర్పించి మొక్కులు చెల్లించుకున్నారు. నిన్న తిరుమల శ్రీవారి హుండీ ఆదాయం 3.52 కోట్ల రూపాయలు వచ్చిందని అధికారులు తెలిపారు.