Liquor Sales In Telangana : భారీగా లిక్కర్ సేల్స్.. ఎప్పుడూ లేనంత రికార్డు స్థాయిలో

గ్రామాల్లో లిక్కర్ షాపులుండకపోవడంతో హైదరాబాద్ జిల్లా కేంద్రాల నుంచి మద్యం బాటిల్స్ ను ఎక్కువగా కొనుగోలు చేసుకుని తీసుకెళుతుంటారు. గ్రామాల్లో ఒకవేళ లభించినా చీప్ లిక్కర్ లభిస్తుండటంతో హైదరాబాద్ నుంచి బ్రాండెడ్ మద్యం బాటిల్స్ ను ఎక్కువ మంది కొనుగోలు చేసినట్లు గణాంకాలు చెబుతున్నాయి. దసరా పండగ తెలంగాణలో పెద్ద పండగ కావడంతో పాటు అందరూ కలసి సెలబ్రేట్ చేసుకుంటారు. అందుకే ఈ పండగకు మద్యం సేల్స్ ఎక్కువయ్యాయంటున్నారు ఎక్సైజ్ అధికారులు. దీంతో పాటు ఆంధ్రప్రదేశ్ కు వెళ్లే వారు కూడా అక్కడ మద్యం బాటిల్స్ బ్రాండెడ్ వి దొరుకుతాయో? లేదోనని భావించి ఒకటో రెండో తమ వెంట తీసుకెళుతున్నారు.

దీంతో దసరాకు ముందు భారీగా మద్యం అమ్మకాలు పెరిగినట్లు ఎక్సైజ్ శాఖ అధికారులు తెలిపారు. దసరా సెలవులు దాదాపు పదిహేను రోజులు ఇవ్వడంతో ఇప్పటికే గ్రామాల బాట పట్టారు జనం. అందుకే గత తొమ్మిది రోజుల నుంచి మద్యం అమ్మకాలు 713 కోట్ల రూపాయల మేర జరిగాయని ఎక్సైజ్ అధికారులు తెలిపారు. ఈ స్థాయిలో మద్యం అమ్మకాలు జరగడం రికార్డు బ్రేక్ అని అంటున్నారు. ప్రభుత్వానికి ఆదాయం భారీగా లభించడంతో ఎక్సైజ్ శాఖ అధికారులు కూడా ఆనందం వ్యక్తం చేస్తున్నారు. ఈరోజు, రేపు మరింతగా మద్యం అమ్మకాలు పెరుగుతాయన్న అంచనాలో ఎక్సైజ్ అధికారులున్నారు.