దేశం మీసం మెలేసిన RRR.. నాటు నాటు పాటకు ఆస్కార్

తెలుగు సినిమా చరిత్ర సృష్టించింది. ఆస్కార్ అవార్డు అందుకున్న తొలి తెలుగు పాటగా నాటు నాటు రికార్డు క్రియేట్ చేసింది. భారతీయుల ఎదురు చూపులు ఫలించాయి. ఈ రోజు కోసం కోటి ఆశలతో ఎదురుచూసిన అందరికీ భావోద్వేగ క్షణం. భారత ప్రభుత్వం తరపున అధికారికంగా ఎంపిక కాకపోవడంతో.. సొంతంగా ఆస్కార్ నామినేషన్లకు వెళ్లిన RRR అనుకున్నది సాధించింది. తెలుగు సినీ ప్రేక్షకుల కలల్ని నిజం చేసింది. బెస్ట్ ఒరిజినల్ సాంగ్ కేటగిరీలో RRR నాటు నాటు పాట నామినేషన్ లో నిలబడింది. ఈ రోజు అమెరికాలోని లాస్ ఏంజిల్స్ లో ఉన్న డాల్బీ థియేటర్లో జరుగుతున్న 95వ ఆస్కార్ అవార్డుల వేడుకలో నాటు నాటు పాట.. ఆస్కార్ అవార్డును అందుకుంది.

ఈ అవార్డులను సంగీత దర్శకుడు ఎంఎం కీరవాణి, రచయిత చంద్రబోస్ అందుకున్నారు. ఈ సందర్భంగా కీరవాణి మాట్లాడుతూ.. ముందుగా ఈ ఆస్కార్ అవార్డులను తయారు చేసిన వారికి కృతజ్ఞతలు తెలిపారు. రాజమౌళి, ఆర్ఆర్ఆర్ టీమ్ మొత్తం ఈ అవార్డు కోసం, ఈ క్షణం కోసం ఎంతగానో ఎదురుచూశామన్నారు. ఈ అవార్డుతో భారతీయులను గర్వించేలా చేశామన్నారు. అంతర్జాతీయ వేదికపై తెలుగు పాటకు పట్టంకట్టిన ఆ సన్నివేశాన్ని చూసి భారత, తెలుగు సంగీత ప్రియులు సంబరాల్లో మునిగిపోయారు. ఇప్పటికే ఎన్నో అంతర్జాతీయ అవార్డులను తన ఖాతాలో వేసుకున్న ఆర్ఆర్ఆర్.. విమర్శకుల ప్రశంసలను అందుకుంది.