సంక్రాంతి రేసులోకి న‌ట‌సింహం దూకేసింది. త‌న‌కు బాగా అచ్చొచ్చిన పండ‌గ సెంటిమెంట్‌ను మ‌రోసారి రిపీట్ చేయ‌డానికి సిద్ధ‌మైపోయింది. సంక్రాంతికి విడుదల అయిన బాలయ్య సినిమాలన్నీ హిట్ టాక్‌కు తెచ్చుకున్న విష‌యం తెలిసిందే! ఇప్పుడు కూడా అదే మ్యాజిక్ రిపీట్ చేయ‌డానికి నంద‌మూరి బాల‌కృష్ణ 'జై సింహా' అంటూ థియేట‌ర్ల‌లో సంద‌డి చేస్తున్నాడు. త‌మిళ సూప‌ర్ స్టార్ ర‌జనీకాంత్‌తో న‌ర‌సింహా, లోక‌నాయ‌కుడు క‌మ‌ల‌హాస‌న్‌తో ద‌శావ‌తారం తీసిన స్టార్ డైరెక్ట‌ర్ కేఎస్ రవికుమార్ ద‌ర్శ‌క‌త్వంలో వ‌చ్చిన జై సింహా.. ఏ మేర‌కు గ‌ర్జిస్తోంది? సినిమాకు కావాల్సిన మాస్ మ‌సాలా హంగుల‌న్నీ ద‌ట్టించిన ఈ మూవీ ప్రేక్షకులను ఏమేరకు ఆకట్టుకుంది? సంక్రాంతి బాలయ్య సెంటిమెంట్ రిపీట్ చేస్తాడా? ఈ విష‌యాలపై ఇప్పుడో లుక్కేద్దాం!
గౌత‌మీ పుత్ర శాత‌క‌ర్ణితో దేశం మీసం మెలేసిన బాలయ్య.. ఇప్పుడు సంక్రాంతి బాక్సాఫీస్‌ను షేక్ చేసేందుకు బాలయ్య తొడ‌కొట్టి గ‌ర్జించాడు. త‌న‌దైన మాస్ యాక్ష‌న్‌తో పాటు సెంటిమెంట్‌ను రంగ‌రించి.. అన్ని అంశాల‌నూ మేళ‌వించి చ‌క్క‌టి విందు భోజ‌నాన్ని సిద్ధం చేశారు కేఎస్ రవికుమార్. ట్రైల‌ర్ విడుద‌లైన ద‌గ్గర నుంచి అభిమానుల్లో ముఖ్యంగా మాస్ ప్రేక్ష‌కుల్లో బాలయ్య సినిమాపై అంచ‌నాలు పెరిగిపోయాయి. అంతేగాక బాలయ్య స్టెప్పులు కూడా సీట్ల‌లో ప్రేక్షకులను కూర్చోనివ్వ‌కుండా చేస్తాయ‌ని ఫిక్స్ అయిపోయారు. బాలయ్య మాస్ మ్యానరిజమ్స్, ముగ్గురు హీరోయిన్లతో మాస్ ఎంటర్ టైనర్ గా ఈ చిత్రం తెరకెక్కింది. యుఎస్ లో ఇప్పటికే ముగిసిన ప్రీమియర్ షోని బట్టి చిత్రం ఏమేరకు ఆకట్టుకునే అవకాశం ఉందొ చూద్దాం.
ఈ మాస్ ఎంటర్ టైనర్ లో బాలయ్య అభిమానులని అలరించాడనికి దర్శకుడు అన్ని ప్రయత్నాలు చేశారు. ఫస్ట్ హాఫ్ ని ఎంటర్ టైనింగ్ గా సెకండ్ హాఫ్ ని ఎమోషనల్ గా నడిపించారు. ఫస్ట్ హాఫ్ లో వచ్చే ‘అమ్ముకుట్టి’ సాంగ్ బాలయ్య అభిమానులని ఉర్రూతలూగిస్తుంది. బాలయ్య స్టెప్పులు అభిమానుల‌కు క‌న్నుల పండ‌గే! ఇంటర్వెల్ సన్నివేశం ఆకట్టుకుంది. నటాషా దోషి, నయనతార గ్లామర్ పరంగా ఆకట్టుకున్నారు. సెకండ్ హాఫ్ లో హరిప్రియతో వచ్చే సన్నివేశాలు సినిమాకు అత్యంత కీలకం. ఎప్పటిలాగే బాలయ్య తన డైలాగ్ డెలివరీ తో, యాక్షన్ సన్నివేశాలతో మెప్పించాడు.
అన్ని హంగులు ఉన్నా కథని తీర్చిదిద్దిన విధానం మాత్రం రొటీన్‌గా ఉంది. పాత ఫార్మాట్ లోనే కథని తయారు చేశారు. ఈ సంక్రాంతి సీజన్ లో బాలయ్య జైసింహాగా బి, సి సెంటర్స్ లో గర్జించే అవకాశాలు ఉన్నాయి. క్లాస్ ప్రేక్షకులను కొంత మెప్పించినా.. మాస్ ప్రేక్ష‌కులు మాత్రం బాలయ్య నుంచి ఏం కోరుకుంటారో అవ‌న్నీ పుష్క‌లంగా ఉన్నాయి. మ‌రి కొద్ది సేప‌ట్లోనే పూర్తి రివ్యూతో క‌లుద్దాం.