ఐస్ క్రీం తిన్న 70 మందికి అనారోగ్యం

శనివారం (జూన్ 3) పంచాయతీ పరిధిలోని ఘాట్‌గుడ, సొండిపుట్, అల్లిగాం, కమలజ్వాల, నువ్వాపుట్, బడలిగుడ గ్రామాల్లో ఓ వ్యక్తి ఐస్‌క్రీమ్ లు విక్రయించాడు. పిల్లలు, పెద్దలు, మహిళలంతా అతని వద్ద ఐస్ క్రీమ్ లు కొనుగోలు చేసి తిన్నారు. రాత్రి భోజనాలు చేసి నిద్రపోయే సమయంలో ఐస్ క్రీమ్ లు తిన్నవారంతా ఒక్కసారిగా అస్వస్థతకు గురయ్యారు. కడుపు నొప్పి, వాంతులు, విరేచనాలతో అస్వస్థతకు గురయ్యారు. వారందరినీ మిగతా కుటుంబ సభ్యులు, గ్రామస్తులు దమన్‌జోడి, సునాబెడ ప్రభుత్వ ఆరోగ్య కేంద్రాలకు తరలించారు. నిలువవున్న ఐస్‌క్రీమ్ లు తినడం వల్ల అది ఫుడ్ పాయిజన్‌ అయి వాంతులు, విరేచనాలు అయినట్లు వైద్యులు తెలిపారు. సమాచారం అందుకున్న పొట్టంగి ఎమ్మెల్యే ప్రీతమ్ పాడి బాధితులు చికిత్స పొందుతున్న ఆరోగ్య కేంద్రాలకు వెళ్లి పరామర్శించారు. చికిత్స అనంతరం కోలుకున్న 60 మందిని నిన్న డిశ్చార్జ్ చేశారు. మరో 10 మంది ఆసుపత్రిలోనే చికిత్స పొందుతున్నారు.