TDP : 41 ఇయర్స్ ఇండ్రస్ట్రీకి ఎంత కష్టం? తొలిసారి చంద్రబాబుకు ఎదురయిందే?

ఈ నెల 27వ తేదీన రాజ్యసభ ఎన్నికలు జరగనున్నాయి. ఇప్పటి వరకూ టీడీపీకి ఉన్న ఒకే ఒక సభ్యుడు పదవీ విరమణ చేయడంతో పాటు అసెంబ్లీలో తగిన బలం లేకపోవడంతో ఈ ఎన్నికల్లో గెలిచే ఛాన్స్ లేదు. మూడు రాజ్యసభ స్థానాలకు ఇప్పటికే వైసీపీ అభ్యర్థులను ప్రకటించింది. వైసీపీకి 151 మంది సభ్యులున్నారు. టీడీపీకి కేవలం 23 మంది మాత్రమే ఉన్నారు. అందులో నలుగురు పార్టీ నుంచి బయటకు వెళ్లిపోయిన వారే. దీంతో 19 మంది సభ్యులు మిగిలితే.. అందులో గంటా శ్రీనివాసరావు రాజీనామా ఆమోదించడంతో 18కే పరిమితమయింది.

రాజ్యసభ స్థానాన్ని గెలుచుకోవాలంటే 41 మంది శాసనసభ్యుల మద్దతు అవసరం. అయితే ఇప్పుడున్న బలాబలాలను చూస్తే మాత్రం టీడీపీకి ఒక్క స్థానం కూడా దక్కే అవకాశం లేదు. అయినా పోటీకి దించి ఎన్నికలకు ముందు పరాభావం పాలవ్వడం ఎందుకన్న భావన టీడీపీ అధినేత చంద్రబాబులో కనిపిస్తుంది. 41 మంది సభ్యులు మద్దుతు కావాలంటే మరో 13 మంది ఎమ్మెల్యేలు వైసీపీ అసంతృప్త ఎమ్మెల్యేల మద్దతు అవసరం. అయితే అంత పెద్ద సంఖ్యలో మద్దతును కూడగట్టడం ఎన్నికల వేళ కష్టమేనని టీడీపీ నేతలు భావిస్తున్నారు.

అందుకనే పోటీలో ఉండాలా? లేదా? అన్నది ఇంకా నిర్ణయించుకోలేదు. నామినేషన్లకు మూడు రోజులు మాత్రమే సమయం ఉంది. ఈ మూడు రోజుల్లో చంద్రబాబు నిర్ణయం తీసుకుంటే నామినేషన్ వేయొచ్చు. లేకుంటే వైసీపీకి మూడు రాజ్యసభ స్థానాలు దక్కే అవకాశముంది. ఎమ్మెల్సీ ఎన్నికల్లో గెలిచినంత సులువు కాదన్న సంగతి చంద్రబాబుకు తెలియంది కాదు. అందుకే దూరంగా ఉంటారా? లేదా? బరిలోకి దిగుతారా? అన్నది ఆసక్తికరంగా మారింది. ఈ రాజ్యసభ ఎన్నికల్లో పోటీ చేయకపోయినా.. పోటీ చేసి ఓటమి పాలయినా తొలి సారి తెలుగుదేశం పార్టీకి రాజ్యసభ జీరో గా మారనుంది. తిరిగి 2026లో ఖాళీ అయ్యే స్థానాల్లో గెలిస్తే తప్ప అప్పట ివరకూ పెద్దల సభలో పార్టీకి చోటు ఉండదు.