Ys jagan : వారినే జగన్ ఎక్కువ తప్పించనున్నారా...? కారణం అందుకే

గత ఎన్నికల సందర్భంగా వైసీపీలో తొలిసారి గెలిచి శాసనసభలో అడుగు పెట్టిన ఎమ్మెల్యేలు దాదాపు 66 మంది ఉన్నారు. కేవలం తన ఇమేజ్ తోనే గత ఎన్నికల్లో గెలిచారు. ఆయన చేసిన సుదీర్ఘ పాదయాత్రతో పాటు గత ప్రభుత్వం చేసిన తప్పిదాలు కూడా వైసీపీ విజయానికి దోహదం చేశాయని చెప్పాలి. కానీ ఇప్పుడు పరిస్థితి వేరు. ఐదేళ్లు జగన్ అధికారంలో ఉన్నారు. ప్లస్ లు ఎన్నో మైనస్ లు కూడా అదేస్థాయిలో ఉండటం సహజం. కొందరు జగన్ పాలనపై సంతృప్తి వ్యక్తం చేస్తుండగా, మరికొందరు అసంతృప్తిగా ఉన్నారు. అందుకే జగన్ ఈసారి అన్ని జాగ్రత్తలు తీసుకుంటున్నారు. కొత్తగా ఎన్నికయిన ఎమ్మెల్యేలలో ఎక్కువ మందికి ఈసారి టిక్కెట్లు రావన్న ప్రచారం జరుగుతుంది.

అయితే కొందరి యువ ఎమ్మెల్యేలల పనితీరు బాగానే ఉన్నా అక్కడ సామాజిక కోణంలో కొందరిని పక్కన పెట్టాల్సిన పరిస్థితి ఏర్పడింది. మరికొందరు ఫస్ట్ టైం గెలిచినా పెద్దగా పట్టు సంపాదించుకోకపోవడం కూడా వారికి మైనస్ గా మారింది. దీంతో పాటు సర్వే నివేదికలు కూడా వారికి నెగిటివ్ వచ్చాయని తెలుస్తోంది. ప్రభుత్వ పథకాలపై జనం సంతృప్తి వ్యక్తం చేస్తున్నప్పటికీ ఎమ్మెల్యే స్థానికంగా అందుబాటులో లేకపోవడం, చిన్న చిన్న సమస్యలను పరిష్కరించకపోవడం కూడా ఈ వ్యతిరేకత కారణంగా చెబుతున్నారు. తొలి సారి ఎన్నికైన 66 మంది ఎమ్మెల్యేలలో సింహభాగం టిక్కెట్లు దక్కడం కష్టమేనని అంటున్నారు. ఇప్పటికే రెండు విడతలుగా జాబితాను వైసీపీ ప్రకటించింది. వైసీపీ ఇన్ ఛార్జులను నియమించింది. అందులో కొత్తగా ఎన్నికైన ఎమ్మెల్యేలు కూడా ఉన్నారు.

పూతలపట్టు ఎమ్మెల్యే ఎంఎస్ బాబు, చిత్తూరు ఎమ్మెల్యే ఆరంగి శ్రీనివాస్, కల్యాణదుర్గం నుంచి ఉషశ్రీ చరణ్, పెనుకొండ నుంచి శంకరనారాయణ, కదిరి నుంచి సిద్దారెడ్డి, సంతనూతలపాడు నుంచి సుధాకర్ బాబు, చిలకలూరి పేట నుంచి విడదల రజని, జగ్గంపేట నుంచి జ్యోతుల చంటి బాబు, రామచంద్రాపురం నుంచి చెల్లుబోయిన వేణుగోపాల కృష్ణ, పాడేరు నియోజకవర్గం నుంచి భాగ్యలక్ష్మి, అరకు నియోజకవర్గం నుంచి చెట్టి ఫాల్గుణ, అనకాపల్లి నుంచి గుడివాడ అమర్ నాథ్, గాజువాక నుంచి తిప్పల నాగిరెడ్డి వంటి వారిని తప్పించారు. వీరిలో కొందరిని ఇతర నియోజకవర్గాలకు పంపగా, మరికొందరిని మాత్రం పూర్తిగా పక్కన పెట్టేశారు. కొందరికి పార్లమెంటు నియోజకవర్గాలకు ఇన్ ఛార్జులుగా నియమించారు.