రెండు నెలల్లో.. హైదరాబాద్-విజయవాడ ఆరు లేన్ల హైవే!!
హైదరాబాద్-విజయవాడ ఆరు లేన్ల జాతీయ రహదారి నిర్మాణ పనులు రెండు నెలల్లో
హైదరాబాద్-విజయవాడ ఆరు లేన్ల జాతీయ రహదారి (ఎన్‌హెచ్ 65) నిర్మాణ పనులు రెండు నెలల్లో ప్రారంభమవుతాయని నేషనల్ హైవే అథారిటీ ఆఫ్ ఇండియా (ఎన్‌హెచ్‌ఏఐ) అధికారులు తెలంగాణ ప్రభుత్వానికి తెలియజేశారు. తెలంగాణలో రోడ్ల నిర్మాణానికి సంబంధించి నేషనల్ హైవేస్ అథారిటీ ఆఫ్ ఇండియా ఎదుర్కొంటున్న సమస్యలపై తెలంగాణ ముఖ్యమంత్రి ఏ రేవంత్ రెడ్డి బుధవారం డాక్టర్ బీఆర్ అంబేద్కర్‌లో ఎన్‌హెచ్‌ఏఐ ఉన్నతాధికారులతో ఉన్నతస్థాయి సమీక్షా సమావేశం నిర్వహించారు. ఈ సమావేశంలో రహదారులు, భవనాల శాఖ మంత్రి కోమటిరెడ్డి వెంకట్‌రెడ్డి ఇప్పటికే హైవేకు భూసేకరణ పూర్తయినందున వెంటనే పనులు ప్రారంభించాలని ఎన్‌హెచ్‌ఏఐ ప్రాజెక్టు సభ్యుడు అనిల్ చౌదరిని కోరారు.
రీజినల్ రింగ్ రోడ్ (ఆర్‌ఆర్‌ఆర్) దక్షిణ భాగాన్ని, ఉత్తర భాగాన్ని ఒకటిగా పరిగణించేందుకు కేంద్ర రోడ్డు రవాణా, జాతీయ రహదారుల శాఖ మంత్రి నితిన్ గడ్కరీ సూత్రప్రాయంగా అంగీకరించారని సీఎం రేవంత్ రెడ్డి ఎన్‌హెచ్‌ఏఐ అధికారుల దృష్టికి తీసుకెళ్లారు. దాని రెండు భాగాలకు ఒకే సంఖ్యను కేటాయించాలన్నారు. ఆర్‌ఆర్‌ఆర్ ఉత్తర ప్రాంతంలో భూసేకరణలో ఉన్న అడ్డంకులను రేవంత్ రెడ్డి అడిగి తెలుసుకున్నారు. ఖమ్మం జిల్లాలోని నాగ్‌పూర్‌-విజయవాడ కారిడార్‌పై ఎన్‌హెచ్‌ఏఐ ద్వారా భూసేకరణపై కూడా ముఖ్యమంత్రి ఆరా తీశారు. ఖమ్మం నుంచి వీడియో కాన్ఫరెన్స్‌లో పాల్గొన్న వ్యవసాయ శాఖ మంత్రి తుమ్మల నాగేశ్వరరావు మాట్లాడుతూ.. ఖమ్మం సమీపంలోని పలు భూములకు భారీ ధరలు పలుకుతూ ఉన్నాయని.. పరిహారంపై రైతులకు భరోసా కల్పిస్తామన్నారు.