Telangana : ఊపిరి పీల్చుకున్న బీఆర్ఎస్ నేతలు... ఇప్పట్లో సేఫ్ అని ఖుషీ

ఫోన్ ట్యాపింగ్ పై విచారణ నడుస్తుంది. అలాగే కాళేశ్వరంలో జరిగిన అవినీతిపై కమిషన్ విచారణ కొనసాగుతుంది. అదే సమయంలో ఫార్ములా వన్ కారు రేసింగ్ వ్యవహారంలో ఇప్పటికే ఎఫ్ఐఆర్ నమోదు చేసిన అధికారులు కేటీఆర్ తో పాటు ఐఏఎస్ అధికారులను కూడా విచారించారు. కానీ వీటిలో ఫోన్ ట్యాపింగ్ వ్యవహారంలో అధికారులను మాత్రమే అరెస్ట్ చేశారు. తప్పించి రాజకీయ నేతలను ఇప్పటి వరకూ టచ్ చేయలేదు. ఇక కాళేశ్వరం పై ఏర్పాటు చేసిన కమిషన్ ఇచ్చే నివేదిక వరకూ వెయిట్ చేయాల్సి ఉండటంతో దానిని పక్కన పెట్టారు. కానీ ఫార్ములా ఇ కారు రేసింగ్ వ్యవహారంలో మాత్రం ఎవరినీ ఇంత వరకూ అరెస్ట్ చేయలేదు. కేటీఆర్ లక్ష్యంగా ఆయన ఈ కేసు నమోదు చేశారని భావించారు.

కేటీఆర్ కూడా తాను జైలుకు వెళ్లేందుకు సిద్ధమని ప్రకటించారు. కానీ విచారణ పూర్తయి నెలలు గడుస్తున్నా ఇప్పటి వరకూ అరెస్ట్ లు జరగలేదు. దీనికి ప్రధాన కారణం స్థానిక సంస్థల ఎన్నికలేనని అంటున్నారు. అవి పూర్తయిన తర్వాత అరెస్ట్ లు జరిగే అవకాశముందని చెబుతున్నారు. అదే సమయంలో అసెంబ్లీలో రేవంత్ రెడ్డి తాను కక్షపూరిత రాజకీయాలకు దిగబోనని ప్రకటించడంతో ఫార్ములా ఈ రేసు కేసులో అరెస్ట్ లు ఉంటాయా? లేదా? అన్న దానిపై ఇంకా సస్పెన్స్ కొనసాగుతూనే ఉంది. అరెస్ట్ చేస్తే అనవసరంగా సానుభూతి ఏర్పడటమే కాకుండా తాము చేసే అభివృద్ధి, సంక్షేమ పథకాలకు ప్రాధాన్యత లేకుండా పోతాయని భావించి రేవంత్ రెడ్డి వెనక్కు తగ్గినట్లు కనిపిస్తుంది. మొత్తం మీద రేవంత్ రెడ్డి చేసిన వ్యాఖ్యలతో ఇప్పట్లో బీఆర్ఎస్ ముఖ్యనేతలు ఏ కేసులోనూ అరెస్ట్ అయి జైలుకు వెళ్లే అవకాశం లేదని స్పష్టంగా అర్థమవుతుంది.