సినిమాల్లో బాలకృష్ణ పంచ్ డైలాగ్స్ కి పెట్టింది పేరు. కంటి చూపుతో చంపేస్తా అంటూ తొడగొట్టే బాలయ్య తెలంగాణ ఎన్నికల్లో టిడిపి విజయానికి ప్రచారం సాగిస్తున్నారు. తన అన్న కుమార్తె సుహాసిని గెలుపు బాధ్యతలను ప్రతిష్టాత్మకంగా తీసుకున్న బాలయ్య కూకట్ పల్లి నియోజక వర్గంలో రోడ్ షోలతో తన సత్తా చాటుతున్నారు. చరిత్ర చింపితే చిరిగిపోదని... చెరిపితే చెరిగిపోదని హైదరాబాద్ అభివృద్ధికి చంద్రబాబు చేసిన పనులను వివరిస్తూ ఓటర్లను ఆకట్టుకునేందుకు తిప్పలు పడుతున్నారు. తనదైన శైలిలో బాలయ్య విసురుతున్న పంచ్ లలో ఒక వ్యాఖ్య తెలుగు రాష్ట్రాల్లో ఇప్పుడు సంచలనంగా మారింది.
ఆ ఎమ్యెల్యేలను ఓడించండి ...
తెలంగాణ లో ప్రత్యర్థి పార్టీల ఎమ్యెల్యేలను గులాబీ కారు ఎక్కించేసుకుంది. అదే పని ఏపీలో టిడిపి సర్కార్ కూడా చేసింది. వైసిపికి చెందిన 23 మంది ఎమ్యెల్యేలను గోడదూకించి సైకిల్ ఎక్కించేసింది. ఇక్కడ దాకా బాగానే వుంది రెండుపార్టీలు దొందుకు దొందు లానే ఫిరాయింపు చట్టాన్ని చుట్టంగా మార్చేశాయి. అయితే ఇప్పుడు బాలయ్య మాత్రం తెలంగాణ ఎన్నికల్లో సిత్రం గా స్పందించారు.
ఏపీకి మినహాయింపా...?
పార్టీ మారిన వారిని ప్రజలు ఓడించాలని పిలుపునిచ్చారు. వారికి జనం బుద్ధి చెప్పాలని బాలయ్య చేసిన వ్యాఖ్యలు టిడిపి లో కలవరాన్ని మిగిల్చాయి. పార్టీ మారిన ఎమ్యెల్యేలను ఓడించాలన్న బాలయ్య హాట్ కామెంట్స్ ఏపీకి మినహాయింపా అని ప్రశ్నిస్తున్నాయి వైసిపి శ్రేణులు. మొత్తానికి ఏపీ లో రాబోయే ఎన్నికల్లో ప్రస్తతం బాలయ్య చేసిన వ్యాఖ్యలు బాబు శత్రువులకు ఆయుధాలు సమకూరుస్తున్నాయి మరి.